ਨਾਂਦੇੜ: ਮਹਾਰਾਸ਼ਟਰ ਫੂਡ ਐਂਡ ਡਰੱਗ ਐਡਮਨਿਸਟ੍ਰੇਸ਼ਨ (ਐਫ.ਡੀ.ਏ.) ਨੇ ਨਾਂਦੇੜ ਜ਼ਿਲ੍ਹੇ ਵਿੱਚ ਛੇ ਅਦਾਰਿਆਂ ਤੋਂ ਲਗਭਗ 2.9 ਲੱਖ ਰੁਪਏ ਮੁੱਲ ਦੇ 675 ਕਿਲੋਗ੍ਰਾਮ ਭੋਜਨ ਪਦਾਰਥ ਜ਼ਬਤ ਕੀਤੇ ਹਨ। ਉਨ੍ਹਾਂ ਦੱਸਿਆ ਕਿ ਇਹ ਕਾਰਵਾਈ ਸੂਬਾ ਵਿਆਪੀ ‘ਸੁਰੱਖਿਅਤ ਭੋਜਨ, ਸੁਰੱਖਿਅਤ ਮਹਾਰਾਸ਼ਟਰ’ ਮੁਹਿੰਮ ਤਹਿਤ ਕੀਤੀ ਗਈ ਹੈ, ਜਿਸ ਦਾ ਉਦੇਸ਼ ਤਿਉਹਾਰਾਂ ਦੇ ਸੀਜ਼ਨ ਦੌਰਾਨ ਸੁਰੱਖਿਅਤ ਅਤੇ ਮਿਆਰੀ ਮਿਠਾਈਆਂ, ਖੋਆ, ਦੁੱਧ ਅਤੇ ਡੇਅਰੀ ਉਤਪਾਦਾਂ ਅਤੇ ਹੋਰ ਖਾਣ-ਪੀਣ ਵਾਲੀਆਂ ਵਸਤੂਆਂ ਦੀ ਉਪਲਬਧਤਾ ਨੂੰ ਯਕੀਨੀ ਬਣਾਉਣਾ ਹੈ।
ਅਧਿਕਾਰੀਆਂ ਨੇ ਬੀਤੇ ਦਿਨ ਦੱਸਿਆ ਕਿ ਛੇ ਅਦਾਰਿਆਂ ‘ਤੇ ਨਿਰੀਖਣ ਦੌਰਾਨ, ਭੋਜਨ ਪਦਾਰਥਾਂ ਦੇ ਅੱਠ ਨਮੂਨੇ ਜਾਂਚ ਲਈ ਇਕੱਠੇ ਕੀਤੇ ਗਏ ਸਨ ਅਤੇ 675 ਕਿਲੋਗ੍ਰਾਮ ਭੋਜਨ ਸਟਾਕ ਜ਼ਬਤ ਕੀਤਾ ਗਿਆ ਸੀ। ਜ਼ਬਤ ਕੀਤੇ ਗਏ ਸਟਾਕ ਵਿੱਚ ਘਿਓ, ਖੋਆ, ਕੁੰਡਾ ਪੇੜਾ, ਮਿੱਠਾ ਪੇੜਾ, ਮਾਵਾ ਪੇੜਾ ਅਤੇ ਖਾਣ ਵਾਲਾ ਤੇਲ ਸ਼ਾਮਲ ਸੀ। ਅਧਿਕਾਰੀਆਂ ਨੇ ਨਾਂਦੇੜ ਦੇ ਡੇਗਲੂਰ ਨਾਕਾ ਸਥਿਤ ਸ਼ਿਵਕ੍ਰਿਪਾ ਦੁੱਧ ਸਟੋਰ ਤੋਂ 88 ਕਿਲੋ ਘਿਓ ਅਤੇ 49 ਕਿਲੋ ਖੋਆ ਜ਼ਬਤ ਕੀਤਾ ਹੈ। ਮਾਲੇਗਾਓਂ ਰੋਡ ‘ਤੇ ਸ੍ਰੀਸਾਈ ਖੋਆ ਕੇਂਦਰ ਤੋਂ 99 ਕਿਲੋ ਖੋਆ ਜ਼ਬਤ ਕੀਤਾ ਗਿਆ ਅਤੇ ਐੱਮ.ਆਈ.ਡੀ.ਸੀ. ਖੇਤਰ ਦੇ ਖੰਡੇਲਵਾਲ ਸਵੀਟਸ ਤੋਂ 99 ਕਿਲੋ ਖੋਆ ਜ਼ਬਤ ਕੀਤਾ ਗਿਆ। ਭੋਕਰ ਤਹਿਸੀਲ ਦੇ ਪਿੰਡ ਪਲਜ ‘ਚ ਬਦਮਰਾਓ ਪੇਠਾ ਵੇਚਣ ਵਾਲੇ ਕੋਲੋਂ 38 ਕਿਲੋ ਕੁੰਡਾ ਪੇੜਾ ਅਤੇ 78 ਕਿਲੋ ਮਿੱਠਾ ਪੇਡਾ ਜ਼ਬਤ ਕੀਤਾ ਗਿਆ।
ਅਧਿਕਾਰੀਆਂ ਨੇ ਬਿਲੋਲੀ ਤਹਿਸੀਲ ਦੇ ਕੁੰਡਲਵਾੜੀ ਵਿੱਚ ਕਾਸ਼ੀਰਾਮ ਡਾਚਾਵਰ ਤੋਂ 146 ਲੀਟਰ ਰਿਫਾਇੰਡ ਸੋਇਆਬੀਨ ਤੇਲ ਅਤੇ ਮਾਹੂਰ ਤਹਿਸੀਲ ਦੇ ਵਾਈ ਬਾਜ਼ਾਰ ਵਿੱਚ ਜਗਦੰਬਾ ਬੀਕਾਨੇਰ ਤੋਂ 78 ਕਿਲੋ ਮਾਵਾ ਪੇੜਾ ਵੀ ਜ਼ਬਤ ਕੀਤਾ। ਇਨ੍ਹਾਂ ਛੇ ਅਦਾਰਿਆਂ ਤੋਂ ਇਲਾਵਾ, ਐਫ.ਡੀ.ਏ. ਨੇ ਜ਼ਿਲ੍ਹੇ ਭਰ ਵਿੱਚ 28 ਭੋਜਨ ਅਦਾਰਿਆਂ ਦੀ ਜਾਂਚ ਕੀਤੀ ਅਤੇ 26 ਨਮੂਨੇ ਜਾਂਚ ਲਈ ਇਕੱਤਰ ਕੀਤੇ। ਅਧਿਕਾਰੀਆਂ ਨੇ ਕਿਹਾ ਕਿ ਜਾਂਚ ਰਿਪੋਰਟ ਦੇ ਆਧਾਰ ‘ਤੇ ਅਗਲੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਜੇਕਰ ਗਾਹਕਾਂ ਨੂੰ ਭੋਜਨ ਵਿੱਚ ਮਿਲਾਵਟ ਜਾਂ ਅਸੁਰੱਖਿਅਤ ਭੋਜਨ ਉਤਪਾਦਾਂ ਦੀ ਵਿਕਰੀ ਦਾ ਸ਼ੱਕ ਹੈ, ਤਾਂ ਉਹ ਐਫ.ਡੀ.ਏ. ਦੇ ਨਾਂਦੇੜ ਦਫ਼ਤਰ ਨਾਲ ਸੰਪਰਕ ਕਰ ਸਕਦੇ ਹਨ ਜਾਂ FOSCOS ਆਨਲਾਈਨ ਪੋਰਟਲ ਜਾਂ ਵਿਭਾਗ ਦੇ ਸ਼ਿਕਾਇਤ ਪੋਰਟਲ ਰਾਹੀਂ ਸ਼ਿਕਾਇਤ ਦਰਜ ਕਰਵਾ ਸਕਦੇ ਹਨ।
