ਅਮਰੀਕਾ: ਇਲੈਕਟ੍ਰਿਕ ਵਾਹਨ ਕੰਪਨੀ ਟੇਸਲਾ ਦੀ ਦੂਜੀ ਪੀੜ੍ਹੀ ਦੀ ਰੋਡਸਟਰ ਸਪੋਰਟਸ ਕਾਰ ਨੂੰ ਲੈ ਕੇ ਲੰਬੇ ਸਮੇਂ ਤੋਂ ਚੱਲ ਰਹੀ ਉਡੀਕ ਹੁਣ ਖ਼ਤਮ ਹੋਣ ਜਾ ਰਹੀ ਹੈ। ਟੇਸਲਾ ਨੇ ਐਲਾਨ ਕੀਤਾ ਹੈ ਕਿ ਨਵੀਂ ਰੋਡਸਟਰ ਨੂੰ 1 ਅਕਤੂਬਰ 2026 ਨੂੰ ਪੇਸ਼ ਕੀਤਾ ਜਾਵੇਗਾ। ਕੰਪਨੀ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ X ’ਤੇ “Go for launch” ਕੈਪਸ਼ਨ ਨਾਲ ਟੀਜ਼ਰ ਜਾਰੀ ਕੀਤਾ, ਜਿਸ ਵਿੱਚ 10.01 ਦੀ ਤਾਰੀਖ ਦਿਖਾਈ ਗਈ ਹੈ। ਐਲਨ ਮਸਕ ਨੇ ਵੀ ਇਸ ਪੋਸਟ ਰਾਹੀਂ ਨਵੀਂ ਰੋਡਸਟਰ ਦੇ ਅਨਵੀਲ ਦੀ ਪੁਸ਼ਟੀ ਕੀਤੀ ਹੈ।
ਨਵੀਂ ਰੋਡਸਟਰ ਨੂੰ ਪਹਿਲੀ ਵਾਰ ਨਵੰਬਰ 2017 ਵਿੱਚ ਪੇਸ਼ ਕੀਤਾ ਗਿਆ ਸੀ। ਇਸ ਦੀਆਂ ਡਿਲਿਵਰੀਆਂ ਪਹਿਲਾਂ 2020 ਵਿੱਚ ਸ਼ੁਰੂ ਹੋਣ ਦੀ ਉਮੀਦ ਸੀ, ਪਰ ਪ੍ਰੋਜੈਕਟ ਵਿੱਚ ਵਾਰ-ਵਾਰ ਦੇਰੀ ਹੁੰਦੀ ਰਹੀ। ਹੁਣ ਕਰੀਬ ਨੌਂ ਸਾਲ ਬਾਅਦ ਟੇਸਲਾ ਇਸ ਕਾਰ ਦਾ ਨਵਾਂ ਵਰਜ਼ਨ ਦੁਨੀਆ ਦੇ ਸਾਹਮਣੇ ਲਿਆਉਣ ਦੀ ਤਿਆਰੀ ਕਰ ਰਹੀ ਹੈ।
ਇਸ ਵਾਰ ਰੋਡਸਟਰ ਦੀ ਸਭ ਤੋਂ ਵੱਡੀ ਖਾਸੀਅਤ ਇਸ ਵਿੱਚ ਵਰਤੀ ਜਾਣ ਵਾਲੀ ਸੰਭਾਵਿਤ SpaceX cold-gas thruster technology ਹੋ ਸਕਦੀ ਹੈ। ਰਿਪੋਰਟਾਂ ਮੁਤਾਬਕ ਸੀਮਿਤ ਗਿਣਤੀ ਵਿੱਚ ਬਣਾਏ ਜਾਣ ਵਾਲੇ ਇੱਕ ਖਾਸ ਵਰਜ਼ਨ ਵਿੱਚ SpaceX ਨਾਲ ਵਿਕਸਤ ਕੀਤੇ ਥ੍ਰਸਟਰ ਲਗਾਏ ਜਾ ਸਕਦੇ ਹਨ। 1 ਅਕਤੂਬਰ ਦੇ ਪ੍ਰੋਗਰਾਮ ਦੌਰਾਨ ਇਸ ਤਕਨਾਲੋਜੀ ਦਾ ਡੈਮੋ ਵੀ ਦਿਖਾਏ ਜਾਣ ਦੀ ਸੰਭਾਵਨਾ ਹੈ।
ਥ੍ਰਸਟਰਾਂ ਨੂੰ ਲੈ ਕੇ “ਕਾਰ ਦੇ ਉੱਡਣ” ਦੀਆਂ ਗੱਲਾਂ ਨੇ ਵੀ ਕਾਫ਼ੀ ਚਰਚਾ ਪੈਦਾ ਕੀਤੀ ਹੈ। ਹਾਲਾਂਕਿ ਇਸ ਦਾ ਮਤਲਬ ਇਹ ਨਹੀਂ ਕਿ ਰੋਡਸਟਰ ਜਹਾਜ਼ ਵਾਂਗ ਅਸਮਾਨ ਵਿੱਚ ਲੰਬੀ ਦੂਰੀ ਤੱਕ ਉੱਡੇਗੀ। ਥ੍ਰਸਟਰ ਤਕਨਾਲੋਜੀ ਦਾ ਉਦੇਸ਼ ਕਾਰ ਦੀ ਕਾਰਗੁਜ਼ਾਰੀ ਵਧਾਉਣ ਜਾਂ ਥੋੜ੍ਹੇ ਸਮੇਂ ਲਈ ਇਸ ਨੂੰ ਜ਼ਮੀਨ ਤੋਂ ਉੱਪਰ ਚੁੱਕਣ ਵਰਗੇ ਪ੍ਰਯੋਗਾਂ ਨਾਲ ਜੁੜਿਆ ਹੋ ਸਕਦਾ ਹੈ। ਇਸ ਦੀ ਅਸਲ ਸਮਰੱਥਾ ਬਾਰੇ ਸਪਸ਼ਟ ਜਾਣਕਾਰੀ 1 ਅਕਤੂਬਰ ਦੇ ਡੈਮੋ ਤੋਂ ਬਾਅਦ ਹੀ ਸਾਹਮਣੇ ਆਵੇਗੀ।
