ਨਵੀਂ ਦਿੱਲੀ: 18ਵੇਂ BRICS ਸੰਮੇਲਨ ਲਈ ਨਵੀਂ ਦਿੱਲੀ ਪਹੁੰਚ ਰਹੇ ਪੱਤਰਕਾਰਾਂ, ਡੈਲੀਗੇਟਾਂ ਅਤੇ ਹੋਰ ਮਹਿਮਾਨਾਂ ਨੂੰ ਵਿਸ਼ੇਸ਼ ਗੁੱਡੀ ਬੈਗ ਦਿੱਤੇ ਜਾ ਰਹੇ ਹਨ। ਇਨ੍ਹਾਂ ਬੈਗਾਂ ਰਾਹੀਂ ਭਾਰਤ ਦੇ ਵੱਖ-ਵੱਖ ਸੂਬਿਆਂ ਦੀ ਸੱਭਿਆਚਾਰਕ ਵਿਭਿੰਨਤਾ, ਸਥਾਨਕ ਉਤਪਾਦਾਂ ਅਤੇ ਹਸਤਕਲਾ ਨੂੰ ਦੁਨੀਆ ਸਾਹਮਣੇ ਪੇਸ਼ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਹੈ।
ਮੀਡੀਆ ਕਿਟ ਵਿੱਚ ਬਿਹਾਰ ਦਾ ਰਵਾਇਤੀ ਸੱਤੂ ਅਤੇ ਮਖਾਨਾ ਸ਼ਾਮਲ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਕੇਲੇ ਦੇ ਚਿਪਸ ਵੀ ਬੈਗ ਦਾ ਹਿੱਸਾ ਹਨ। ਓਡੀਸ਼ਾ ਦੇ ਕੋਰਾਪੁਟ ਖੇਤਰ ਦੀ ਕੌਫੀ ਨੂੰ ਵੀ ਇਸ ਵਿੱਚ ਥਾਂ ਦਿੱਤੀ ਗਈ ਹੈ, ਜਦਕਿ ਗੁਜਰਾਤ ਦੀ ਹਸਤਕਲਾ ਨੂੰ ਵੀ ਸ਼ਾਮਲ ਕਰਕੇ ਦੇਸ਼ ਦੀ ਵੱਖ-ਵੱਖ ਖੇਤਰੀ ਵਿਰਾਸਤ ਨੂੰ ਦਰਸਾਇਆ ਗਿਆ ਹੈ।
ਵਿਦੇਸ਼ ਮੰਤਰਾਲੇ ਨਾਲ ਜੁੜੇ ਅਧਿਕਾਰੀਆਂ ਮੁਤਾਬਕ ਇਸ ਪਹਿਲ ਦਾ ਮਕਸਦ ਅੰਤਰਰਾਸ਼ਟਰੀ ਮੀਡੀਆ ਅਤੇ ਵਿਦੇਸ਼ੀ ਮਹਿਮਾਨਾਂ ਨੂੰ ਭਾਰਤ ਦੀ ਵਿਭਿੰਨਤਾ ਨਾਲ ਜਾਣੂ ਕਰਵਾਉਣਾ ਹੈ। ਗੁੱਡੀ ਬੈਗ ਸਿਰਫ਼ ਤੋਹਫ਼ੇ ਤੱਕ ਸੀਮਤ ਨਹੀਂ ਹਨ, ਸਗੋਂ ਇਨ੍ਹਾਂ ਨੂੰ ‘ਇੰਡੀਆ ਸਟੋਰੀ’ ਅਤੇ ਭਾਰਤ ਦੀ ਸੱਭਿਆਚਾਰਕ ਪਛਾਣ ਪੇਸ਼ ਕਰਨ ਦੇ ਇੱਕ ਮਾਧਿਅਮ ਵਜੋਂ ਤਿਆਰ ਕੀਤਾ ਗਿਆ ਹੈ।
ਭਾਰਤ ਇਸ ਸਾਲ BRICS ਦੀ ਮੇਜ਼ਬਾਨੀ ਕਰ ਰਿਹਾ ਹੈ। 18ਵਾਂ BRICS ਸੰਮੇਲਨ 12 ਅਤੇ 13 ਸਤੰਬਰ ਨੂੰ ਨਵੀਂ ਦਿੱਲੀ ਦੇ ਭਾਰਤ ਮੰਡਪਮ ਵਿੱਚ ਹੋਵੇਗਾ। ਸੰਮੇਲਨ ਵਿੱਚ BRICS ਦੇ ਮੈਂਬਰ ਦੇਸ਼ਾਂ ਦੇ ਆਗੂਆਂ ਤੋਂ ਇਲਾਵਾ ਭਾਈਵਾਲ ਦੇਸ਼ਾਂ ਦੇ ਨੁਮਾਇੰਦੇ ਵੀ ਸ਼ਾਮਲ ਹੋ ਰਹੇ ਹਨ।
ਇਸ ਤਰ੍ਹਾਂ ਉੱਚ ਪੱਧਰੀ ਕੂਟਨੀਤਕ ਬੈਠਕ ਦੇ ਨਾਲ ਭਾਰਤ ਵੱਲੋਂ ਆਪਣੀ ਖੇਤਰੀ ਖੁਰਾਕ, ਸਥਾਨਕ ਉਤਪਾਦਾਂ ਅਤੇ ਹਸਤਕਲਾ ਨੂੰ ਵੀ ਵਿਸ਼ਵ ਪੱਧਰ ’ਤੇ ਪੇਸ਼ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
