ਸਪੋਰਟਸ ਡੈਸਕ: ਭਾਰਤੀ ਹਾਕੀ ਦੇ ਭਵਿੱਖ ਨੂੰ ਨਵੀਂ ਦਿਸ਼ਾ ਦੇਣ ਵਾਲੀ 16ਵੀਂ ਹਾਕੀ ਇੰਡੀਆ ਜੂਨੀਅਰ ਪੁਰਸ਼ ਰਾਸ਼ਟਰੀ ਚੈਂਪੀਅਨਸ਼ਿਪ 2026 ਦਾ ਆਗਾਜ਼ 28 ਜੁਲਾਈ ਤੋਂ ਤਾਮਿਲਨਾਡੂ ਦੇ ਕੋਇੰਬਟੂਰ ਵਿੱਚ ਹੋਵੇਗਾ। ਦੇਸ਼ ਭਰ ਦੀਆਂ 30 ਟੀਮਾਂ ਅਗਲੇ 12 ਦਿਨਾਂ ਤੱਕ ਰਾਸ਼ਟਰੀ ਖਿਤਾਬ ਲਈ ਜ਼ੋਰ ਅਜ਼ਮਾਇਸ਼ ਕਰਨਗੀਆਂ। ਟੂਰਨਾਮੈਂਟ ਦਾ ਫਾਈਨਲ 8 ਅਗਸਤ ਨੂੰ ਖੇਡਿਆ ਜਾਵੇਗਾ, ਜਿਸ ਵਿੱਚ ਡਿਵੀਜ਼ਨ-ਏ ਦਾ ਜੇਤੂ ਰਾਸ਼ਟਰੀ ਚੈਂਪੀਅਨ ਬਣੇਗਾ।
ਤਿੰਨ ਡਿਵੀਜ਼ਨਾਂ ਵਿੱਚ ਹੋਵੇਗਾ ਮੁਕਾਬਲਾ
ਇਸ ਵਾਰ ਟੂਰਨਾਮੈਂਟ ਨੂੰ ਡਿਵੀਜ਼ਨ-ਏ, ਡਿਵੀਜ਼ਨ-ਬੀ ਅਤੇ ਡਿਵੀਜ਼ਨ-ਸੀ ਵਿੱਚ ਵੰਡਿਆ ਗਿਆ ਹੈ। ਡਿਵੀਜ਼ਨ-ਏ ਦੀਆਂ ਟੀਮਾਂ ਰਾਸ਼ਟਰੀ ਖਿਤਾਬ ਲਈ ਖੇਡਣਗੀਆਂ, ਜਦਕਿ ਡਿਵੀਜ਼ਨ-ਬੀ ਅਤੇ ਡਿਵੀਜ਼ਨ-ਸੀ ਦੀਆਂ ਟੀਮਾਂ ਅਗਲੇ ਪੱਧਰ ‘ਤੇ ਪ੍ਰਮੋਸ਼ਨ ਹਾਸਲ ਕਰਨ ਦੀ ਕੋਸ਼ਿਸ਼ ਕਰਨਗੀਆਂ। ਉੱਥੇ ਹੀ ਖਰਾਬ ਪ੍ਰਦਰਸ਼ਨ ਕਰਨ ਵਾਲੀਆਂ ਟੀਮਾਂ ਨੂੰ ਰੈਲੀਗੇਸ਼ਨ ਦਾ ਸਾਹਮਣਾ ਕਰਨਾ ਪਵੇਗਾ।
ਡਿਵੀਜ਼ਨ-ਏ ਵਿੱਚ ਇਨ੍ਹਾਂ ਟੀਮਾਂ ਵਿਚਾਲੇ ਹੋਵੇਗੀ ਖਿਤਾਬ ਦੀ ਜੰਗ
ਡਿਵੀਜ਼ਨ-ਏ ਵਿੱਚ ਕੁੱਲ 12 ਟੀਮਾਂ ਨੂੰ ਚਾਰ ਪੂਲਾਂ ਵਿੱਚ ਵੰਡਿਆ ਗਿਆ ਹੈ।
ਪੂਲ-A: ਹਾਕੀ ਹਰਿਆਣਾ, ਹਾਕੀ ਮੱਧ ਪ੍ਰਦੇਸ਼, ਹਾਕੀ ਯੂਨਿਟ ਆਫ ਤਾਮਿਲਨਾਡੂ
ਪੂਲ-B: ਹਾਕੀ ਐਸੋਸੀਏਸ਼ਨ ਆਫ ਓਡੀਸ਼ਾ, ਮਣੀਪੁਰ ਹਾਕੀ, ਦਾਦਰਾ ਅਤੇ ਨਗਰ ਹਵੇਲੀ ਅਤੇ ਦਮਣ ਅਤੇ ਦੀਵ ਹਾਕੀ
ਪੂਲ-C: ਹਾਕੀ ਪੰਜਾਬ, ਹਾਕੀ ਝਾਰਖੰਡ, ਦਿੱਲੀ ਹਾਕੀ
ਪੂਲ-D: ਉੱਤਰ ਪ੍ਰਦੇਸ਼ ਹਾਕੀ, ਹਾਕੀ ਕਰਨਾਟਕ, ਹਾਕੀ ਬੰਗਾਲ
ਹਰੇਕ ਪੂਲ ਵਿੱਚੋਂ ਸਿਖਰ ਦੀਆਂ ਦੋ ਟੀਮਾਂ 5 ਅਗਸਤ ਨੂੰ ਹੋਣ ਵਾਲੇ ਕੁਆਰਟਰ ਫਾਈਨਲ ਵਿੱਚ ਪਹੁੰਚਣਗੀਆਂ। ਇਸ ਤੋਂ ਬਾਅਦ 6 ਅਗਸਤ ਨੂੰ ਸੈਮੀਫਾਈਨਲ ਅਤੇ 8 ਅਗਸਤ ਨੂੰ ਕਾਂਸੀ ਤਗਮਾ ਮੁਕਾਬਲਾ ਅਤੇ ਫਾਈਨਲ ਖੇਡਿਆ ਜਾਵੇਗਾ। ਡਿਵੀਜ਼ਨ-ਏ ਦੀਆਂ ਸਭ ਤੋਂ ਹੇਠਲੀਆਂ ਦੋ ਟੀਮਾਂ ਅਗਲੇ ਸੀਜ਼ਨ ਵਿੱਚ ਡਿਵੀਜ਼ਨ-ਬੀ ਵਿੱਚ ਚਲੀ ਜਾਣਗੀਆਂ।
ਡਿਵੀਜ਼ਨ-ਬੀ ਅਤੇ ਸੀ ਵਿੱਚ ਪ੍ਰਮੋਸ਼ਨ ਦੀ ਜੰਗ
ਡਿਵੀਜ਼ਨ-ਬੀ ਵਿੱਚ 10 ਟੀਮਾਂ ਦੋ ਪੂਲਾਂ ਵਿੱਚ ਖੇਡਣਗੀਆਂ। ਸਿਖਰ ਦੀਆਂ ਦੋ ਟੀਮਾਂ ਅਗਲੇ ਸੀਜ਼ਨ ਵਿੱਚ ਡਿਵੀਜ਼ਨ-ਏ ਵਿੱਚ ਪਹੁੰਚਣਗੀਆਂ, ਜਦਕਿ ਹੇਠਲੀਆਂ ਦੋ ਟੀਮਾਂ ਦਾ ਰੈਲੀਗੇਸ਼ਨ ਡਿਵੀਜ਼ਨ-ਸੀ ਵਿੱਚ ਹੋਵੇਗਾ। ਡਿਵੀਜ਼ਨ-ਸੀ ਵਿੱਚ ਅੱਠ ਟੀਮਾਂ ਦੋ ਪੂਲਾਂ ਵਿੱਚ ਖੇਡਣਗੀਆਂ ਅਤੇ ਇੱਥੋਂ ਸਿਖਰ ਦੀਆਂ ਦੋ ਟੀਮਾਂ ਅਗਲੇ ਸੀਜ਼ਨ ਵਿੱਚ ਡਿਵੀਜ਼ਨ-ਬੀ ਵਿੱਚ ਪ੍ਰਮੋਟ ਹੋਣਗੀਆਂ।
ਅਜਿਹਾ ਹੋਵੇਗਾ ਪੁਆਇੰਟਸ ਸਿਸਟਮ
ਲੀਗ ਪੜਾਅ ਵਿੱਚ ਜਿੱਤ ‘ਤੇ ਤਿੰਨ ਅੰਕ, ਡਰਾਅ ‘ਤੇ ਇੱਕ ਅੰਕ ਅਤੇ ਹਾਰ ‘ਤੇ ਕੋਈ ਅੰਕ ਨਹੀਂ ਮਿਲੇਗਾ। ਡਿਵੀਜ਼ਨ-ਏ ਦੇ ਨਾਕਆਊਟ ਮੁਕਾਬਲਿਆਂ ਵਿੱਚ ਜੇਕਰ ਮੈਚ ਬਰਾਬਰੀ ‘ਤੇ ਸਮਾਪਤ ਹੁੰਦਾ ਹੈ ਤਾਂ FIH ਟੂਰਨਾਮੈਂਟ ਨਿਯਮਾਂ ਅਨੁਸਾਰ ਸ਼ੂਟਆਊਟ ਰਾਹੀਂ ਜੇਤੂ ਦਾ ਫ਼ੈਸਲਾ ਕੀਤਾ ਜਾਵੇਗਾ।
ਦਿਲੀਪ ਤਿਰਕੀ ਬੋਲੇ- ਇੱਥੋਂ ਹੀ ਨਿਕਲਦੇ ਹਨ ਭਾਰਤ ਦੇ ਭਵਿੱਖ ਦੇ ਸਿਤਾਰੇ
ਹਾਕੀ ਇੰਡੀਆ ਦੇ ਪ੍ਰਧਾਨ ਦਿਲੀਪ ਤਿਰਕੀ ਨੇ ਕਿਹਾ ਕਿ ਇਹ ਟੂਰਨਾਮੈਂਟ ਨੌਜਵਾਨ ਖਿਡਾਰੀਆਂ ਲਈ ਆਪਣੀ ਪ੍ਰਤਿਭਾ ਦਿਖਾਉਣ ਦਾ ਸਭ ਤੋਂ ਵੱਡਾ ਮੰਚ ਹੈ। ਉਨ੍ਹਾਂ ਕਿਹਾ, ‘ਜੂਨੀਅਰ ਪੁਰਸ਼ ਰਾਸ਼ਟਰੀ ਚੈਂਪੀਅਨਸ਼ਿਪ ਭਾਰਤੀ ਹਾਕੀ ਨੂੰ ਮਜ਼ਬੂਤ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦੀ ਹੈ। ਇਸ ਪੱਧਰ ‘ਤੇ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਵਾਲੇ ਕਈ ਖਿਡਾਰੀ ਅੱਗੇ ਚੱਲ ਕੇ ਭਾਰਤ ਦੀ ਨੁਮਾਇੰਦਗੀ ਕਰ ਚੁੱਕੇ ਹਨ। ਸਾਨੂੰ ਭਰੋਸਾ ਹੈ ਕਿ ਇਸ ਵਾਰ ਵੀ ਕਈ ਨਵੇਂ ਪ੍ਰਤਿਭਾਸ਼ਾਲੀ ਖਿਡਾਰੀ ਸਾਹਮਣੇ ਆਉਣਗੇ। ਅਸੀਂ ਸਾਰੀਆਂ ਟੀਮਾਂ ਨੂੰ ਸ਼ੁਭਕਾਮਨਾਵਾਂ ਦਿੰਦੇ ਹਾਂ।’
ਭੋਲਾ ਨਾਥ ਸਿੰਘ ਨੇ ਦੱਸਿਆ ਕਿਉਂ ਖਾਸ ਹੈ ਇਹ ਟੂਰਨਾਮੈਂਟ
ਹਾਕੀ ਇੰਡੀਆ ਦੇ ਮਹਾਸਚਿਵ ਭੋਲਾ ਨਾਥ ਸਿੰਘ ਨੇ ਕਿਹਾ ਕਿ ਪ੍ਰਮੋਸ਼ਨ ਅਤੇ ਰੈਲੀਗੇਸ਼ਨ ਪ੍ਰਣਾਲੀ ਖਿਡਾਰੀਆਂ ਲਈ ਇਸ ਮੁਕਾਬਲੇ ਨੂੰ ਹੋਰ ਵੀ ਚੁਣੌਤੀਪੂਰਨ ਬਣਾਉਂਦੀ ਹੈ। ਉਨ੍ਹਾਂ ਕਿਹਾ, *’ਜੂਨੀਅਰ ਪੁਰਸ਼ ਰਾਸ਼ਟਰੀ ਚੈਂਪੀਅਨਸ਼ਿਪ ਨੌਜਵਾਨ ਖਿਡਾਰੀਆਂ ਦੇ ਵਿਕਾਸ ਦੀ ਦਿਸ਼ਾ ਵਿੱਚ ਮਹੱਤਵਪੂਰਨ ਕਦਮ ਹੈ। ਇਹ ਮੁਕਾਬਲਾ ਖਿਡਾਰੀਆਂ ਨੂੰ ਮੈਚ ਦਾ ਤਜਰਬਾ ਦੇਣ ਦੇ ਨਾਲ-ਨਾਲ ਰਾਜਾਂ ਵਿਚਾਲੇ ਸਿਹਤਮੰਦ ਮੁਕਾਬਲੇ ਨੂੰ ਵੀ ਉਤਸ਼ਾਹਿਤ ਕਰਦਾ ਹੈ। ਸਾਨੂੰ ਰੋਮਾਂਚਕ ਹਾਕੀ ਦੇਖਣ ਦੀ ਉਮੀਦ ਹੈ ਅਤੇ ਸਾਰੀਆਂ ਟੀਮਾਂ ਨੂੰ ਸ਼ੁਭਕਾਮਨਾਵਾਂ।’
ਪਹਿਲੇ ਦਿਨ ਇਨ੍ਹਾਂ ਮੁਕਾਬਲਿਆਂ ‘ਤੇ ਰਹੇਗੀ ਨਜ਼ਰ
28 ਜੁਲਾਈ ਨੂੰ ਮੁਕਾਬਲੇ ਦੀ ਸ਼ੁਰੂਆਤ ਡਿਵੀਜ਼ਨ-ਸੀ ਦੇ ਮੈਚਾਂ ਨਾਲ ਹੋਵੇਗੀ।
* ਅਸਾਮ ਹਾਕੀ vs ਹਾਕੀ ਮਿਜ਼ੋਰਮ – ਸਵੇਰੇ 6:00 ਵਜੇ
* ਗੋਅਨਸ ਹਾਕੀ vs ਹਾਕੀ ਰਾਜਸਥਾਨ – ਸਵੇਰੇ 7:30 ਵਜੇ
* ਤੇਲੰਗਾਨਾ ਹਾਕੀ vs ਤ੍ਰਿਪੁਰਾ ਓਲੰਪਿਕ ਐਸੋਸੀਏਸ਼ਨ – ਸਵੇਰੇ 9:00 ਵਜੇ
* ਲੇ ਪੁਡੂਚੇਰੀ ਹਾਕੀ vs ਹਾਕੀ ਗੁਜਰਾਤ – ਸਵੇਰੇ 10:30 ਵਜੇ
ਇਸ ਤੋਂ ਬਾਅਦ ਡਿਵੀਜ਼ਨ-ਬੀ ਦੇ ਮੁਕਾਬਲੇ ਖੇਡੇ ਜਾਣਗੇ
* ਹਾਕੀ ਮਹਾਰਾਸ਼ਟਰ vs ਹਾਕੀ ਹਿਮਾਚਲ – ਦੁਪਹਿਰ 12:00 ਵਜੇ
* ਹਾਕੀ ਉੱਤਰਾਖੰਡ vs ਕੇਰਲ ਹਾਕੀ – ਦੁਪਹਿਰ 1:30 ਵਜੇ
* ਹਾਕੀ ਆਂਧਰਾ ਪ੍ਰਦੇਸ਼ vs ਬਿਹਾਰ (BSSA) – ਦੁਪਹਿਰ 3:00 ਵਜੇ
* ਹਾਕੀ ਚੰਡੀਗੜ੍ਹ vs ਛੱਤੀਸਗੜ੍ਹ ਹਾਕੀ – ਸ਼ਾਮ 4:30 ਵਜੇ
ਡਿਵੀਜ਼ਨ-ਏ ਦੇ ਮੁਕਾਬਲਿਆਂ ਦੀ ਸ਼ੁਰੂਆਤ 1 ਅਗਸਤ ਤੋਂ ਹੋਵੇਗੀ।
