ਫਿਰੋਜ਼ਪੁਰ: ਪੰਜਾਬ ਦੇ ਫਿਰੋਜ਼ਪੁਰ ਨਾਲ ਸਬੰਧਤ ਮਸ਼ਹੂਰ ਪਹਿਲਵਾਨ ਅਤੇ ਪਾਵਰ ਸਲੈਪ ਮੁਕਾਬਲੇਬਾਜ਼ ਅਮਨਪ੍ਰੀਤ ਸਿੰਘ ਨੇ ਅੰਤਰਰਾਸ਼ਟਰੀ ਮੰਚ ‘ਤੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਸਾਬਕਾ WWE ਵਰਲਡ ਹੈਵੀਵੇਟ ਚੈਂਪੀਅਨ ਜੇਕ ਹੈਗਰ ਨੂੰ ਇੱਕ ਹੀ ਥੱਪੜ ਨਾਲ ਨਾਕਆਊਟ ਕਰ ਦਿੱਤਾ। ਇਸ ਜਿੱਤ ਤੋਂ ਬਾਅਦ ਪੰਜਾਬੀ ਖੇਡ ਪ੍ਰੇਮੀਆਂ ਵਿੱਚ ਖੁਸ਼ੀ ਦੀ ਲਹਿਰ ਦੌੜ ਗਈ ਹੈ ਅਤੇ ਸੋਸ਼ਲ ਮੀਡੀਆ ‘ਤੇ ਵੀ ਸ਼ੇਰਾ ਦੀ ਜ਼ਬਰਦਸਤ ਚਰਚਾ ਹੋ ਰਹੀ ਹੈ।
ਪਾਵਰ ਸਲੈਪ ਮੁਕਾਬਲੇ ਦੌਰਾਨ ਸ਼ੁਰੂਆਤੀ ਦੋ ਰਾਊਂਡਾਂ ਵਿੱਚ ਜੈਕ ਹੇਗਰ ਨੇ ਆਪਣੀ ਤਾਕਤ ਅਤੇ ਤਜਰਬੇ ਦਾ ਪ੍ਰਭਾਵ ਦਿਖਾਇਆ। ਉਸ ਨੇ ਮੁਕਾਬਲੇ ਵਿੱਚ ਬੜ੍ਹਤ ਬਣਾਈ ਰੱਖੀ ਅਤੇ ਦਰਸ਼ਕਾਂ ਨੂੰ ਲੱਗ ਰਿਹਾ ਸੀ ਕਿ ਉਹ ਆਸਾਨੀ ਨਾਲ ਜਿੱਤ ਦਰਜ ਕਰ ਲਵੇਗਾ। ਪਰ ਤੀਜੇ ਰਾਊਂਡ ਵਿੱਚ ਮੈਚ ਦਾ ਪਾਸਾ ਪੂਰੀ ਤਰ੍ਹਾਂ ਬਦਲ ਗਿਆ।
ਜਦੋਂ ਅਮਨਪ੍ਰੀਤ ਸਿੰਘ ਸ਼ੇਰਾ ਦੀ ਵਾਰੀ ਆਈ ਤਾਂ ਉਸ ਨੇ ਪੂਰੀ ਤਾਕਤ ਨਾਲ ਥੱਪੜ ਮਾਰਿਆ। ਇਹ ਥੱਪੜ ਇੰਨਾ ਜ਼ੋਰਦਾਰ ਸੀ ਕਿ ਜੈਕ ਹੇਗਰ ਤੁਰੰਤ ਸੰਤੁਲਨ ਗੁਆ ਬੈਠਾ ਅਤੇ ਜ਼ਮੀਨ ‘ਤੇ ਡਿੱਗ ਪਿਆ। ਰਿਪੋਰਟਾਂ ਅਨੁਸਾਰ ਹੇਗਰ ਕੁਝ ਸਮੇਂ ਤੱਕ ਉੱਠ ਨਹੀਂ ਸਕਿਆ, ਜਿਸ ਤੋਂ ਬਾਅਦ ਅਧਿਕਾਰੀਆਂ ਨੇ ਮੈਚ ਨੂੰ ਰੋਕ ਦਿੱਤਾ ਅਤੇ ਸ਼ੇਰਾ ਨੂੰ ਜੇਤੂ ਐਲਾਨ ਦਿੱਤਾ।
ਜਿੱਤ ਦੀ ਘੋਸ਼ਣਾ ਹੁੰਦੇ ਹੀ ਸ਼ੇਰਾ ਨੇ ਖੁਸ਼ੀ ਦਾ ਇਜ਼ਹਾਰ ਕਰਦਿਆਂ ਆਪਣੀ ਟੀ-ਸ਼ਰਟ ਹਿਲਾਈ ਅਤੇ ਦਰਸ਼ਕਾਂ ਦਾ ਧੰਨਵਾਦ ਕੀਤਾ। ਉਸ ਦੀ ਇਹ ਜਿੱਤ ਨਾ ਸਿਰਫ਼ ਉਸਦੇ ਕਰੀਅਰ ਲਈ ਮਹੱਤਵਪੂਰਨ ਮੰਨੀ ਜਾ ਰਹੀ ਹੈ, ਸਗੋਂ ਪੰਜਾਬ ਅਤੇ ਭਾਰਤ ਲਈ ਵੀ ਮਾਣ ਵਾਲੀ ਗੱਲ ਮੰਨੀ ਜਾ ਰਹੀ ਹੈ।
ਖੇਡ ਮਾਹਿਰਾਂ ਦਾ ਕਹਿਣਾ ਹੈ ਕਿ ਪਾਵਰ ਸਲੈਪ ਵਰਗੇ ਮੁਕਾਬਲਿਆਂ ਵਿੱਚ ਸਿਰਫ਼ ਤਾਕਤ ਹੀ ਨਹੀਂ, ਸਗੋਂ ਸਹੀ ਤਕਨੀਕ ਅਤੇ ਸਰੀਰਕ ਸੰਤੁਲਨ ਵੀ ਬਹੁਤ ਅਹਿਮ ਹੁੰਦੇ ਹਨ। ਸ਼ੇਰਾ ਨੇ ਆਪਣੇ ਤਜਰਬੇ ਅਤੇ ਸ਼ਕਤੀ ਦਾ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਦੁਨੀਆ ਭਰ ਦੇ ਦਰਸ਼ਕਾਂ ਨੂੰ ਪ੍ਰਭਾਵਿਤ ਕੀਤਾ ਹੈ।
ਪੰਜਾਬ ਦੇ ਨੌਜਵਾਨਾਂ ਲਈ ਵੀ ਇਹ ਪ੍ਰਦਰਸ਼ਨ ਪ੍ਰੇਰਣਾ ਦਾ ਸਰੋਤ ਬਣਿਆ ਹੈ। ਸੋਸ਼ਲ ਮੀਡੀਆ ‘ਤੇ ਹਜ਼ਾਰਾਂ ਲੋਕ ਸ਼ੇਰਾ ਨੂੰ ਵਧਾਈਆਂ ਦੇ ਰਹੇ ਹਨ ਅਤੇ ਉਸ ਦੀ ਇਸ ਇਤਿਹਾਸਕ ਜਿੱਤ ਨੂੰ ਪੰਜਾਬੀ ਜਜ਼ਬੇ ਅਤੇ ਮਿਹਨਤ ਦੀ ਮਿਸਾਲ ਦੱਸ ਰਹੇ ਹਨ।
