ਲੰਡਨ ਪਹੁੰਚੀ ਭਾਰਤੀ ਸੀਨੀਅਰ ਪੁਰਸ਼ ਰਾਸ਼ਟਰੀ ਫੁੱਟਬਾਲ ਟੀਮ

ਸਪੋਰਟਸ ਡੈਸਕ: ਭਾਰਤੀ ਸੀਨੀਅਰ ਪੁਰਸ਼ ਰਾਸ਼ਟਰੀ ਫੁੱਟਬਾਲ ਟੀਮ ਯੂਨਿਟੀ ਕੱਪ 2026 ਵਿੱਚ ਹਿੱਸਾ ਲੈਣ ਲਈ ਇੰਗਲੈਂਡ ਦੀ ਰਾਜਧਾਨੀ ਲੰਡਨ ਪਹੁੰਚ ਗਈ ਹੈ। ਭਾਰਤ 24 ਸਾਲਾਂ ਬਾਅਦ ਇੰਗਲੈਂਡ ਵਿੱਚ ਕੋਈ ਅੰਤਰਰਾਸ਼ਟਰੀ ਮੈਚ ਖੇਡੇਗਾ।ਇਸ ਤੋਂ ਪਹਿਲਾਂ ਭਾਰਤੀ ਟੀਮ ਨੇ ਆਖਰੀ ਵਾਰ 2002 ਵਿੱਚ ਇੰਗਲੈਂਡ ਦੀ ਧਰਤੀ ‘ਤੇ ਮੁਕਾਬਲਾ ਖੇਡਿਆ ਸੀ ।

ਖਾਲਿਦ ਜਮੀਲ ਦੀ ਅਗਵਾਈ ਵਾਲੀ ਭਾਰਤੀ ਟੀਮ ਬੀਤੀ ਸਵੇਰੇ ਬੰਗਲੁਰੂ ਤੋਂ ਲੰਡਨ ਲਈ ਰਵਾਨਾ ਹੋਈ। ਰਾਸ਼ਟਰੀ ਕੈਂਪ 2025-26 ਇੰਡੀਅਨ ਸੁਪਰ ਲੀਗ ਦੀ ਸਮਾਪਤੀ ਤੋਂ ਤੁਰੰਤ ਬਾਅਦ 22 ਮਈ ਨੂੰ ਸਥਾਪਤ ਕੀਤਾ ਗਿਆ ਸੀ।

ਮੋਹੁਨ ਬਾਗਾਨ ਨੇ ਵਾਪਸ ਬੁਲਾਏ ਖਿਡਾਰੀ
ਟੂਰਨਾਮੈਂਟ ਸ਼ੁਰੂ ਹੋਣ ਤੋਂ ਪਹਿਲਾਂ ਭਾਰਤੀ ਟੀਮ ਨੂੰ ਵੱਡਾ ਝਟਕਾ ਲੱਗਾ। ਮੋਹਨ ਬਾਗਾਨ ਸੁਪਰ ਜਾਇੰਟਸ ਨੇ 23 ਮਈ ਨੂੰ ਰਾਸ਼ਟਰੀ ਕੈਂਪ ਤੋਂ ਆਪਣੇ ਖਿਡਾਰੀਆਂ ਨੂੰ ਵਾਪਸ ਬੁਲਾ ਲਿਆ। ਆਖਰੀ ਸਮੇਂ ਦੀ ਵਾਪਸੀ ਕਾਰਨ, ਭਾਰਤੀ ਟੀਮ ਸਿਰਫ 17 ਖਿਡਾਰੀਆਂ ਨਾਲ ਲੰਡਨ ਲਈ ਰਵਾਨਾ ਹੋਈ। ਹਾਲਾਂਕਿ, ਗੋਲਕੀਪਰ ਰਿ ਤਿਕ ਤਿਵਾੜੀ ਵੱਖਰੇ ਤੌਰ ‘ਤੇ ਯਾਤਰਾ ਕਰ ਰਹੇ ਹਨ ਅਤੇ ਅੱਜ, ਸੋਮਵਾਰ ਨੂੰ ਟੀਮ ਵਿੱਚ ਸ਼ਾਮਲ ਹੋਣਗੇ।

ਜਮੈਕਾ ਨਾਲ ਹੋਵੇਗਾ ਮੁਕਾਬਲਾ
ਭਾਰਤ ਇਸ ਸਮੇਂ ਫੀਫਾ ਰੈਂਕਿੰਗ ਵਿੱਚ 136ਵੇਂ ਸਥਾਨ ‘ਤੇ ਹੈ। ਭਾਰਤੀ ਟੀਮ 27 ਮਈ ਦੀ ਅੱਧੀ ਰਾਤ ਨੂੰ ਯੂਨਿਟੀ ਕੱਪ 2026 ਦੇ ਦੂਜੇ ਸੈਮੀਫਾਈਨਲ ਵਿੱਚ ਫੀਫਾ ਰੈਂਕਿੰਗ ਵਿੱਚ 71ਵੇਂ ਸਥਾਨ ‘ਤੇ ਕਾਬਜ਼ ਜਮੈਕਾ ਨਾਲ ਭਿੜੇਗੀ। ਪਹਿਲੇ ਸੈਮੀਫਾਈਨਲ ਵਿੱਚ ਨਾਈਜੀਰੀਆ ਅਤੇ ਜ਼ਿੰਬਾਬਵੇ ਇੱਕ ਦੂਜੇ ਦਾ ਸਾਹਮਣਾ ਕਰਨਗੇ। ਨਾਈਜੀਰੀਆ ਫੀਫਾ ਰੈਂਕਿੰਗ ਵਿੱਚ 26ਵੇਂ ਸਥਾਨ ‘ਤੇ ਹੈ, ਜਦੋਂ ਕਿ ਜ਼ਿੰਬਾਬਵੇ 130ਵੇਂ ਸਥਾਨ ‘ਤੇ ਹੈ।

ਤੀਜੇ ਸਥਾਨ ਲਈ ਵੀ ਹੋਵੇਗਾ ਮੁਕਾਬਲਾ
ਸੈਮੀਫਾਈਨਲ ਵਿੱਚ ਹਾਰਨ ਵਾਲੀਆਂ ਦੋ ਟੀਮਾਂ ਤੀਜੇ ਸਥਾਨ ਲਈ ਪਲੇ-ਆਫ ਖੇਡਣਗੀਆਂ। ਟੂਰਨਾਮੈਂਟ ਦੇ ਸਾਰੇ ਮੈਚ ਲੰਡਨ ਦੇ ਮਸ਼ਹੂਰ ‘ਦ ਵੈਲੀ’ ਸਟੇਡੀਅਮ ਵਿੱਚ ਖੇਡੇ ਜਾਣਗੇ, ਜੋ ਕਿ ਚਾਰਲਟਨ ਐਥਲੈਟਿਕ ਫੁੱਟਬਾਲ ਕਲੱਬ ਦਾ ਘਰ ਹੈ।

ਯੂਨਿਟੀ ਕੱਪ 2026 ਲਈ ਭਾਰਤ ਦੀ ਟੀਮ
ਗੋਲਕੀਪਰ: ਗੁਰਪ੍ਰੀਤ ਸਿੰਘ ਸੰਧੂ, ਰਿਤਿਕ ਤਿਵਾੜੀ, ਐਲਬੀਨੋ ਗੋਮਸ

ਡਿਫੈਂਡਰ: ਰਾਹੁਲ ਭੇਕੇ, ਨਿਖਿਲ ਪੁਜਾਰੀ, ਰੋਸ਼ਨ ਸਿੰਘ ਨੌਰੇਮ, ਸੰਦੇਸ਼ ਝਿੰਗਨ, ਆਕਾਸ਼ ਮਿਸ਼ਰਾ, ਬਿਜੋਏ ਵਰਗੀਸ, ਪ੍ਰਮਵੀਰ।

ਮਿਡਫੀਲਡਰ: ਜੈਕਸਨ ਸਿੰਘ ਥੌਨੋਜਮ, ਨੌਫਲ ਪੀ.ਐਨ., ਰਿਕੀ ਸ਼ਬੋਂਗ

ਫਾਰਵਰਡ: ਰਿਆਨ ਵਿਲੀਅਮਜ਼, ਐਡਮੰਡ ਲਾਲਰਿੰਡਿਕਾ, ਲਾਲੀਅਨਜੁਆਲਾ ਛਾਂਗਤੇ, ਰਹੀਮ ਅਲੀ, ਫਾਰੂਖ ਚੌਧਰੀ।