ਦਿੱਲੀ: ਭਾਰਤ ਦੀ ਪ੍ਰਮੁੱਖ ਫਿਨਟੈਕ ਕੰਪਨੀ ਪੇਟੀਐਮ ਨੇ ਕਿਸ਼ੋਰਾਂ ਅਤੇ ਬੱਚਿਆਂ ਲਈ ਇੱਕ ਨਵਾਂ ਡਿਜੀਟਲ ਭੁਗਤਾਨ ਫੀਚਰ ‘ਪੇਟੀਐਮ ਪਾਕੇਟ ਮਨੀ’ ਲਾਂਚ ਕੀਤਾ ਹੈ। ਇਸ ਨਵੀਂ ਸਹੂਲਤ ਰਾਹੀਂ ਹੁਣ ਬੱਚੇ ਆਪਣੇ ਨਿੱਜੀ ਬੈਂਕ ਖਾਤੇ ਤੋਂ ਬਿਨਾਂ ਵੀ ਸੁਰੱਖਿਅਤ ਤਰੀਕੇ ਨਾਲ ਯੂ.ਪੀ.ਆਈ. ਭੁਗਤਾਨ ਕਰ ਸਕਣਗੇ।
ਇਸ ਨਵੇਂ ਫੀਚਰ ਦਾ ਮੁੱਖ ਉਦੇਸ਼ ਬੱਚਿਆਂ ਨੂੰ ਛੋਟੀ ਉਮਰ ਤੋਂ ਹੀ ਡਿਜੀਟਲ ਲੈਣ-ਦੇਣ ਅਤੇ ਵਿੱਤੀ ਅਨੁਸ਼ਾਸਨ ਨਾਲ ਜਾਣੂ ਕਰਵਾਉਣਾ ਹੈ। ਇਸਦੀ ਮਦਦ ਨਾਲ ਬੱਚੇ ਸਕੂਲ, ਟਿਊਸ਼ਨ, ਖਾਣ-ਪੀਣ ਜਾਂ ਹੋਰ ਰੋਜ਼ਾਨਾ ਖਰਚਾਂ ਲਈ ਕਿਊ.ਆਰ ਕੋਡ ਸਕੈਨ ਕਰਕੇ ਆਸਾਨੀ ਨਾਲ ਭੁਗਤਾਨ ਕਰ ਸਕਣਗੇ। ਖਾਸ ਗੱਲ ਇਹ ਹੈ ਕਿ ਇਸ ਲਈ ਉਨ੍ਹਾਂ ਨੂੰ ਵੱਖਰਾ ਬੈਂਕ ਖਾਤਾ ਖੋਲ੍ਹਣ ਦੀ ਲੋੜ ਨਹੀਂ ਪਵੇਗੀ।
ਕੰਪਨੀ ਮੁਤਾਬਕ ‘ਪਾਕੇਟ ਮਨੀ’ ਫੀਚਰ ਅਧੀਨ ਬੱਚਿਆਂ ਲਈ ਮਹੀਨਾਵਾਰ 15,000 ਰੁ. ਤੱਕ ਦੀ ਖਰਚ ਸੀਮਾ ਨਿਰਧਾਰਤ ਕੀਤੀ ਗਈ ਹੈ। ਇਸ ਤੋਂ ਇਲਾਵਾ ਮਾਪਿਆਂ ਕੋਲ ਆਪਣੇ ਬੱਚਿਆਂ ਦੇ ਖਰਚ ‘ਤੇ ਪੂਰਾ ਨਿਯੰਤਰਣ ਰਹੇਗਾ। ਮਾਪੇ ਆਪਣੇ ਮੋਬਾਈਲ ਰਾਹੀਂ ਹਰ ਲੈਣ-ਦੇਣ ਨੂੰ ਅਸਲ ਸਮੇਂ ਵਿੱਚ ਟਰੈਕ ਕਰ ਸਕਣਗੇ ਅਤੇ ਲੋੜ ਅਨੁਸਾਰ ਖਰਚ ਸੀਮਾਵਾਂ ਵੀ ਤੈਅ ਕਰ ਸਕਣਗੇ।
ਪੇਟੀਐਮ ਦਾ ਕਹਿਣਾ ਹੈ ਕਿ ਇਹ ਫੀਚਰ ਖਾਸ ਤੌਰ ‘ਤੇ ਉਨ੍ਹਾਂ ਮਾਪਿਆਂ ਲਈ ਲਾਭਦਾਇਕ ਸਾਬਤ ਹੋਵੇਗਾ ਜੋ ਆਪਣੇ ਬੱਚਿਆਂ ਨੂੰ ਨਕਦ ਪੈਸਿਆਂ ਦੀ ਥਾਂ ਡਿਜੀਟਲ ਤਰੀਕੇ ਨਾਲ ਖਰਚ ਦੇਣਾ ਚਾਹੁੰਦੇ ਹਨ। ਇਸ ਨਾਲ ਨਾ ਸਿਰਫ਼ ਲੈਣ-ਦੇਣ ਸੁਰੱਖਿਅਤ ਬਣੇਗਾ, ਸਗੋਂ ਬੱਚਿਆਂ ਵਿੱਚ ਜ਼ਿੰਮੇਵਾਰ ਖਰਚ ਕਰਨ ਦੀ ਆਦਤ ਵੀ ਵਿਕਸਿਤ ਹੋਵੇਗੀ।
