ਗੁਜਰਾਤ : ਗੁਜਰਾਤ ਸਰਕਾਰ ਨੇ ਸਾਲ 2026-27 ਦੇ ਲਈ 4 ਲੱਖ 8 ਹਜ਼ਾਰ 53 ਕਰੋੜ ਰੁਪਏ ਦਾ ਬਜਟ ਪੇਸ਼ ਕੀਤਾ ਹੈ। ਰਾਜ ਦੇ ਵਿੱਤ ਮੰਤਰੀ ਕਾਨੂ ਦੇਸਾਈ ਨੇ ਵਿਧਾਨ ਸਭਾ ਵਿੱਚ ਬਜਟ ਪੇਸ਼ ਕਰਦੇ ਹੋਏ ਕਿਹਾ ਕਿ ਇਹ ਬਜਟ 25 ਹਜਾਰ 587 ਕਰੋੜ ਰੁਪਏ ਦਾ ਸਰਪਲੱਸ ਹੈ। ਸਰਕਾਰ ਨੇ ਵਿਕਾਸ, ਵਾਤਾਵਰਣ, ਊਰਜਾ ਅਤੇ ਖੇਡ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ ‘ਤੇ ਵਿਸ਼ੇਸ਼ ਜ਼ੋਰ ਦਿੱਤਾ ਹੈ।
ਬਜਟ ਵਿੱਚ VG-GRAMG ਯੋਜਨਾ ਦੇ ਤਹਿਤ 16 ਹਜਾਰ ਕਰੋੜ ਰੁਪਏ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਨਾਲ ਹੀ, 90 ਕਰੋੜ ਰੁਪਏ ਦੀ ਲਾਗਤ ਨਾਲ ਇੱਕ ਨਵਾਂ ਹਾਕੀ ਸਟੇਡੀਅਮ ਬਣਾਇਆ ਜਾਵੇਗਾ। ਸਰਕਾਰ ਨੇ ਕਿਹਾ ਕਿ ਰਾਜ ਨੂੰ ਖੇਡਾਂ ਅਤੇ ਬੁਨਿਆਦੀ ਢਾਂਚੇ ਦੇ ਖੇਤਰ ਵਿੱਚ ਨਵੀਆਂ ਉਚਾਈਆਂ ‘ਤੇ ਲਿਜਾਣਾ ਹੈ।
ਅਹਿਮਦਾਬਾਦ ਬਣੇਗਾ ‘ਓਲੰਪਿਕ ਰੈਡੀ ਸਿਟੀ’
ਆਉਣ ਵਾਲੀਆਂ ਰਾਸ਼ਟਰਮੰਡਲ ਖੇਡਾਂ 2030 ਦੇ ਮੱਦੇਨਜ਼ਰ, ਅਹਿਮਦਾਬਾਦ ਨੂੰ ‘ਓਲੰਪਿਕ ਰੈਡੀ ਸਿਟੀ’ ਵਜੋਂ ਵਿਕਸਤ ਕੀਤਾ ਜਾਵੇਗਾ। ਇਸ ਦੇ ਲਈ, ਅੰਤਰਰਾਸ਼ਟਰੀ ਪੱਧਰ ’ਤੇ ਖੇਡ ਕੰਪਲੈਕਸ, ਆਧੁਨਿਕ ਸਟੇਡੀਅਮ ਅਤੇ ਬਿਹਤਰ ਜਨਤਕ ਆਵਾਜਾਈ ਸਹੂਲਤਾਂ ਵਿਕਸਤ ਕੀਤੀਆਂ ਜਾਣਗੀਆਂ। ਇਸ ਕੰਮ ਦੇ ਲਈ 1,278 ਕਰੋੜ ਰੁਪਏ ਦਾ ਪ੍ਰਬੰਧ ਰੱਖਿਆ ਗਿਆ ਹੈ।
ਜਲਵਾਯੂ ਪਰਿਵਰਤਨ ਵਿਭਾਗ ਦੇ ਲਈ 429 ਕਰੋੜ ਰੁਪਏ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਗੁਜਰਾਤ ਨੇ ਜਲਵਾਯੂ ਐਕਸ਼ਨ ਟ੍ਰੈਕਰ ਪੋਰਟਲ ਸ਼ੁਰੂ ਕੀਤਾ ਹੈ, ਜੋ ਕਿ ਜ਼ਿਲ੍ਹਾ ਪੱਧਰ ‘ਤੇ ਜਲਵਾਯੂ ਨਾਲ ਜੁੜੇ ਅੰਕੜੇ ਦਿਖਾਉਣ ਵਾਲਾ ਦੇਸ਼ ਦਾ ਪਹਿਲਾ ਪੋਰਟਲ ਹੈ। ਸਰਕਾਰੀ ਇਮਾਰਤਾਂ ‘ਤੇ ਸੂਰਜੀ ਛੱਤਾਂ ਲਗਾਉਣ ਲਈ 278 ਕਰੋੜ ਰੁਪਏ ਅਲਾਟ ਕੀਤੇ ਗਏ ਹਨ।
ਇਲੈਕਟ੍ਰਿਕ ਦੋ-ਪਹੀਆ ਅਤੇ ਤਿੰਨ-ਪਹੀਆ ਵਾਹਨਾਂ ‘ਤੇ ਸਬਸਿਡੀ ਲਈ 16 ਕਰੋੜ ਰੁਪਏ ਅਤੇ ਲਗਭਗ 70 ਸੰਸਥਾਵਾਂ ਵਿੱਚ ਬਾਇਓਗੈਸ ਪਲਾਂਟ ਲਗਾਉਣ ਦੇ ਲਈ 12 ਕਰੋੜ ਰੁਪਏ ਅਲਾਟ ਕੀਤੇ ਗਏ ਹਨ। ਸਕੂਲੀ ਬੱਚਿਆਂ ਨੂੰ ਜਲਵਾਯੂ ਜਾਗਰੂਕਤਾ ਦੇ ਲਈ 9 ਕਰੋੜ ਰੁਪਏ ਅਤੇ 1,200 ਸ਼ਮਸ਼ਾਨਘਾਟਾਂ ਦੀ ਸਥਾਪਨਾ ਲਈ 7 ਕਰੋੜ ਰੁਪਏ ਅਲਾਟ ਕੀਤੇ ਗਏ ਹਨ। ਗ੍ਰੀਨ ਸਟਾਰਟਅੱਪਸ ਨੂੰ ਉਤਸ਼ਾਹਿਤ ਕਰਨ ਲਈ 5 ਕਰੋੜ ਰੁਪਏ ਦਿੱਤੇ ਜਾਣਗੇ।
ਬਜਟ ਵਿੱਚ ਵਾਤਾਵਰਣ ਦਾ ਵੀ ਧਿਆਨ
ਜੰਗਲਾਤ ਅਤੇ ਵਾਤਾਵਰਣ ਵਿਭਾਗ ਦੇ ਲਈ 3,560 ਕਰੋੜ ਰੁਪਏ ਦਾ ਬਜਟ ਰੱਖਿਆ ਗਿਆ ਹੈ। ਕੱਛ ਦੇ ਬੰਨੀ ਖੇਤਰ ਵਿੱਚ ਚਾਰੀ-ਧੰਧ ਵੈਟਲੈਂਡ ਨੂੰ ਰਾਮਸਰ ਸਾਈਟ ਦਾ ਦਰਜਾ ਮਿਲਣ ਦੇ ਨਾਲ, ਰਾਜ ਵਿੱਚ ਅਜਿਹੇ ਸਾਈਟਾਂ ਦੀ ਗਿਣਤੀ ਹੁਣ ਪੰਜ ਹੋ ਗਈ ਹੈ। ਸਮਾਜਿਕ ਜੰਗਲਾਤ ਲਈ 750 ਕਰੋੜ ਰੁਪਏ, ਜੰਗਲਾਤ ਸੰਭਾਲ ਲਈ 667 ਕਰੋੜ ਰੁਪਏ ਅਤੇ ਜੰਗਲੀ ਜੀਵ ਪ੍ਰਬੰਧਨ ਲਈ 479 ਕਰੋੜ ਰੁਪਏ ਦਾ ਪ੍ਰਬੰਧ ਕੀਤਾ ਗਿਆ ਹੈ।
ਊਰਜਾ, ਕਿਸਾਨ ਅਤੇ ਫਿਲਮ ਉਦਯੋਗ ਨੂੰ ਵਾਧਾ
ਊਰਜਾ ਅਤੇ ਪੈਟਰੋ ਕੈਮੀਕਲ ਵਿਭਾਗ ਨੂੰ 4,842 ਕਰੋੜ ਰੁਪਏ ਦਿੱਤੇ ਗਏ ਹਨ। ਕਿਸਾਨ ਸੂਰਯੋਦਯ ਯੋਜਨਾ ਤਹਿਤ ਕਿਸਾਨਾਂ ਨੂੰ ਦਿਨ ਵੇਲੇ ਬਿਜਲੀ ਪ੍ਰਦਾਨ ਕਰਨ ਲਈ 500 ਕਰੋੜ ਰੁਪਏ ਅਲਾਟ ਕੀਤੇ ਗਏ ਹਨ। ਨਵੇਂ ਖੇਤੀਬਾੜੀ ਬਿਜਲੀ ਕੁਨੈਕਸ਼ਨਾਂ ਲਈ 1,166 ਕਰੋੜ ਰੁਪਏ ਅਤੇ ਨਵੇਂ ਸਬਸਟੇਸ਼ਨਾਂ ਦੇ ਲਈ 350 ਕਰੋੜ ਰੁਪਏ ਅਲਾਟ ਕੀਤੇ ਗਏ ਹਨ।
ਪ੍ਰਧਾਨ ਮੰਤਰੀ ਕੁਸੁਮ ਯੋਜਨਾ ਤਹਿਤ, ਸੂਰਜੀ ਖੇਤੀਬਾੜੀ ਪੰਪਾਂ ਦੇ ਲਈ 200 ਕਰੋੜ ਅਤੇ ਊਰਜਾ ਸੰਭਾਲ ਯੋਜਨਾ ਦੇ ਲਈ 100 ਕਰੋੜ ਅਲਾਟ ਕੀਤੇ ਗਏ ਹਨ। ਰਾਜ ਵਿੱਚ ਈਵੀ ਚਾਰਜਿੰਗ ਸਟੇਸ਼ਨਾਂ ਨੂੰ ਵਿਕਸਤ ਕਰਨ ਦੇ ਲਈ 50 ਕਰੋੜ ਅਲਾਟ ਕੀਤੇ ਗਏ ਹਨ। ਇਸ ਤੋਂ ਇਲਾਵਾ, ਬਿਜਲੀ ਦੀਆਂ ਲਾਈਨਾਂ ਨੂੰ ਜ਼ਮੀਨਦੋਜ਼ ਕਰਨ ਅਤੇ ਤੀਰਥ ਸਥਾਨਾਂ ‘ਤੇ ਸੁਰੱਖਿਅਤ ਬਿਜਲੀ ਸਪਲਾਈ ਲਈ ਵੀ ਫੰਡ ਨਿਰਧਾਰਤ ਕੀਤੇ ਗਏ ਹਨ।
ਸੂਚਨਾ ਅਤੇ ਪ੍ਰਸਾਰਣ ਵਿਭਾਗ ਦੇ ਲਈ 452 ਕਰੋੜ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਗੁਜਰਾਤੀ ਫਿਲਮਾਂ ਨੂੰ ਉਤਸ਼ਾਹਿਤ ਕਰਨ ਲਈ 23 ਕਰੋੜ ਰੁਪਏ ਅਲਾਟ ਕੀਤੇ ਜਾਣਗੇ। ਰਾਜ ਦੇ ਸਮਾਜਿਕ-ਰਾਜਨੀਤਿਕ ਇਤਿਹਾਸ ਨਾਲ ਸਬੰਧਤ ਅਖ਼ਬਾਰਾਂ ਅਤੇ ਕਿਤਾਬਾਂ ਨੂੰ ਡਿਜੀਟਾਈਜ਼ ਕੀਤਾ ਜਾਵੇਗਾ। ਦੂਰ-ਦੁਰਾਡੇ ਇਲਾਕਿਆਂ ਤੋਂ ਤੇਜ਼ੀ ਨਾਲ ਖ਼ਬਰਾਂ ਦੇ ਪ੍ਰਸਾਰਣ ਲਈ ਮੋਬਾਈਲ ਪੱਤਰਕਾਰੀ ਕਿੱਟਾਂ ਵੀ ਪ੍ਰਦਾਨ ਕੀਤੀਆਂ ਜਾਣਗੀਆਂ।
