ਉਦੈਪੁਰ : ਰਾਜਸਥਾਨ ਦੇ ਉਦੈਪੁਰ ਦੇ ਸਾਬਕਾ ਸ਼ਾਹੀ ਪਰਿਵਾਰ ਦੇ ਮੈਂਬਰ ਅਰਵਿੰਦ ਸਿੰਘ ਮੇਵਾੜ ਦਾ ਦੇਹਾਂਤ ਹੋ ਗਿਆ। ਉਹ ਲੰਬੇ ਸਮੇਂ ਤੋਂ ਬਿਮਾਰ ਸਨ ਅਤੇ ਸਿਟੀ ਪੈਲੇਸ ਦੀ ਰਿਹਾਇਸ਼ ‘ਤੇ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਸੀ। ਅਰਵਿੰਦ ਸਿੰਘ ਮੇਵਾੜ ਮਹਾਰਾਣਾ ਭਾਗਵਤ ਸਿੰਘ ਮੇਵਾੜ ਅਤੇ ਸੁਸ਼ੀਲਾ ਕੁਮਾਰੀ ਮੇਵਾੜ ਦੇ ਛੋਟੇ ਪੁੱਤਰ ਸਨ। ਉਨ੍ਹਾਂ ਦੇ ਵੱਡੇ ਭਰਾ ਮਹਿੰਦਰ ਸਿੰਘ ਮੇਵਾੜ ਦਾ ਪਿਛਲੇ ਸਾਲ 10 ਨਵੰਬਰ 2024 ਨੂੰ ਦੇਹਾਂਤ ਹੋ ਗਿਆ ਸੀ। ਅਰਵਿੰਦ ਸਿੰਘ ਨੇ ਅਜਮੇਰ ਦੇ ਵੱਕਾਰੀ ਮੇਯੋ ਕਾਲਜ ਤੋਂ ਆਪਣੀ ਸਕੂਲੀ ਪੜ੍ਹਾਈ ਕੀਤੀ ਅਤੇ ਫਿਰ ਉਦੈਪੁਰ ਦੇ ਮਹਾਰਾਣਾ ਭੂਪਾਲ ਕਾਲਜ ਤੋਂ ਆਰਟਸ ਵਿੱਚ ਗ੍ਰੈਜੂਏਸ਼ਨ ਕੀਤੀ। ਉਨ੍ਹਾਂ ਨੇ ਸੇਂਟ ਅਲਬੈਂਸ ਮੈਟਰੋਪੋਲੀਟਨ ਕਾਲਜ, ਯੂ.ਕੇ ਤੋਂ ਹੋਟਲ ਮੈਨੇਜਮੈਂਟ ਵਿੱਚ ਡਿਗਰੀ ਵੀ ਲਈ ਸੀ।
ਅਰਵਿੰਦ ਸਿੰਘ ਮੇਵਾੜ ਦੇ ਹਨ ਤਿੰਨ ਬੱਚੇ
ਅਰਵਿੰਦ ਸਿੰਘ ਨੇ ਅਮਰੀਕਾ ਵਿੱਚ ਕੁਝ ਸਮੇਂ ਲਈ ਕੰਮ ਵੀ ਕੀਤਾ। ਉਹ ਐਚ.ਆਰ.ਐਚ. ਗਰੁੱਪ ਆਫ ਹੋਟਲਜ਼ ਦੇ ਚੇਅਰਮੈਨ ਅਤੇ ਪ੍ਰਬੰਧ ਨਿਰਦੇਸ਼ਕ ਸਨ। ਇਸ ਤੋਂ ਇਲਾਵਾ ਉਹ ਮਹਾਰਾਣਾ ਮੇਵਾੜ ਫਾਊਂਡੇਸ਼ਨ ਟਰੱਸਟ, ਮਹਾਰਾਣਾ ਮੇਵਾੜ ਇ ਤਿਹਾਸਕ ਪ੍ਰਕਾਸ਼ ਟਰੱਸਟ, ਰਾਜਮਾਤਾ ਗੁਲਾਬ ਕੁੰਵਰ ਚੈਰੀਟੇਬਲ ਟਰੱਸਟ ਦੇ ਚੇਅਰਮੈਨ ਰਹੇ। ਅਰਵਿੰਦ ਸਿੰਘ ਮੇਵਾੜ ਦੇ ਤਿੰਨ ਬੱਚੇ ਹਨ। ਉਸ ਦੀਆਂ ਦੋ ਧੀਆਂ ਅਤੇ ਇੱਕ ਪੁੱਤਰ ਹੈ। ਬੇਟੇ ਦਾ ਨਾਮ ਲਕਸ਼ਯਰਾਜ ਸਿੰਘ ਹੈ। ਲਕਸ਼ਯਰਾਜ ਸਿੰਘ ਪੈਲੇਸ ਅਤੇ ਟਰੱਸਟ ਨਾਲ ਜੁੜੇ ਕੰਮ ਵੀ ਕਰ ਰਹੇ ਹਨ।
