ਨਾਈਜੀਰੀਆ: ਨਾਈਜੀਰੀਆ ਦੇ ਉੱਤਰ-ਪੂਰਬੀ ਰਾਜ ਯੋਬੇ ਸਟੇਟ ਵਿੱਚ ਇੱਕ ਦਰਦਨਾਕ ਹਾਦਸੇ ਵਿੱਚ ਘੱਟੋ-ਘੱਟ 25 ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦੋਂ ਕਿ 14 ਹਾਲੇੇ ਵੀ ਲਾਪਤਾ ਹਨ। ਇਹ ਹਾਦਸਾ ਉਸ ਸਮੇਂ ਵਾਪਰਿਆ ਜਦੋਂ ਦਰਜਨਾਂ ਯਾਤਰੀਆਂ ਨੂੰ ਲੈ ਕੇ ਜਾ ਰਹੀ ਇੱਕ ਕਿਸ਼ਤੀ ਇੱਕ ਨਦੀ ਵਿੱਚ ਪਲਟ ਗਈ। ਅਧਿਕਾਰੀਆਂ ਨੇ ਬੀਤੇ ਦਿਨ ਇਸਦੀ ਪੁਸ਼ਟੀ ਕੀਤੀ ।
ਕਿਵੇਂ ਹੋਇਆ ਹਾਦਸਾ ?
ਇਹ ਹਾਦਸਾ ਸ਼ਨੀਵਾਰ ਸ਼ਾਮ ਨੂੰ ਲਗਭਗ 8 ਵਜੇ (ਸਥਾਨਕ ਸਮੇਂ) ਵਾਪਰਿਆ। ਰਿਪੋਰਟਾਂ ਅਨੁਸਾਰ, ਇੱਕ ਵੱਡੀ ਲੱਕੜ ਦੀ ਕਿਸ਼ਤੀ ਉੱਤਰ-ਪੱਛਮੀ ਜਿਗਾਵਾ ਰਾਜ ਦੇ ਅਡਿਆਨੀ ਪਿੰਡ ਤੋਂ ਰਵਾਨਾ ਹੋਈ ਅਤੇ ਯੋਬੇ ਰਾਜ ਦੇ ਗਾਰਬੀ ਵੱਲ ਜਾ ਰਹੀ ਸੀ। ਕਿਸ਼ਤੀ ਅਚਾਨਕ ਪਲਟ ਗਈ। ਉਸ ਸਮੇਂ ਕੁੱਲ 52 ਯਾਤਰੀ ਸਵਾਰ ਸਨ। ਯੋਬੇ ਸਟੇਟ ਐਮਰਜੈਂਸੀ ਮੈਨੇਜਮੈਂਟ ਏਜੰਸੀ ਦੇ ਮੁਖੀ ਮੁਹੰਮਦ ਗੋਜੇ ਨੇ ਕਿਹਾ, “ਹੁਣ ਤੱਕ, 13 ਯਾਤਰੀਆਂ ਨੂੰ ਜ਼ਿੰਦਾ ਬਚਾਇਆ ਗਿਆ ਹੈ, 25 ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ ਅਤੇ 14 ਦੀ ਭਾਲ ਜਾਰੀ ਹੈ।”
ਬਚਾਅ ਕਾਰਜ ਜਾਰੀ
ਗੋਜੇ ਦੇ ਅਨੁਸਾਰ, ਨੇੜਲੇ ਕਸਬਿਆਂ ਦੇ ਸਥਾਨਕ ਵਲੰਟੀਅਰ, ਸੁਰੱਖਿਆ ਏਜੰਸੀਆਂ ਅਤੇ ਐਮਰਜੈਂਸੀ ਟੀਮਾਂ ਲਾਪਤਾ ਲੋਕਾਂ ਲਈ ਖੋਜ ਅਤੇ ਬਚਾਅ ਕਾਰਜ ਚਲਾ ਰਹੀਆਂ ਹਨ। ਗੋਤਾਖੋਰ ਨਦੀ ਵਿੱਚ ਭਾਲ ਕਰ ਰਹੇ ਹਨ। ਖ਼ਰਾਬ ਮੌਸਮ ਬਚਾਅ ਕਾਰਜਾਂ ਵਿੱਚ ਰੁਕਾਵਟ ਪਾ ਰਿਹਾ ਹੈ।
ਬਾਜ਼ਾਰ ਤੋਂ ਵਾਪਸ ਆ ਰਹੇ ਲੋਕ
ਜਿਗਾਵਾ ਰਾਜ ਪੁਲਿਸ ਨੇ ਹਾਦਸੇ ਦੀ ਪੁਸ਼ਟੀ ਕਰਦੇ ਹੋਏ ਕਿਹਾ ਕਿ ਕਿਸ਼ਤੀ ਦੇ ਜ਼ਿਆਦਾਤਰ ਯਾਤਰੀ ਖਰੀਦਦਾਰੀ ਤੋਂ ਵਾਪਸ ਆ ਰਹੇ ਸਨ। ਜਿਗਾਵਾ ਪੁਲਿਸ ਦੇ ਬੁਲਾਰੇ ਲਾਵਨ ਐਡਮ ਨੇ ਕਿਹਾ, “ਇਹ ਬਾਜ਼ਾਰ ਦਾ ਦਿਨ ਸੀ। ਹਾਦਸਾ ਕਿਸ਼ਤੀ ਵਿੱਚ ਲੀਕ ਹੋਣ ਕਾਰਨ ਹੋਇਆ। ਜੇਕਰ ਕਿਸ਼ਤੀ ਚਾਲਕ ਜ਼ਿੰਦਾ ਪਾਇਆ ਜਾਂਦਾ ਹੈ, ਤਾਂ ਉਸ ‘ਤੇ ਲਾਪਰਵਾਹੀ ਦਾ ਦੋਸ਼ ਲਗਾਇਆ ਜਾਵੇਗਾ।” ਉਸਨੇ ਇਹ ਵੀ ਕਿਹਾ ਕਿ ਸੁਰੱਖਿਆ ਨਿਯਮਾਂ, ਜਿਵੇਂ ਕਿ ਰਾਤ ਦੀ ਯਾਤਰਾ ‘ਤੇ ਪਾਬੰਦੀ ਅਤੇ ਓਵਰਲੋਡਿੰਗ ‘ਤੇ ਪਾਬੰਦੀ, ਦੀ ਸ਼ਰੇਆਮ ਉਲੰਘਣਾ ਕੀਤੀ ਗਈ ਸੀ।
ਸਥਾਨਕ ਲੋਕਾਂ ਨੇ ਸੁਣਾਈ ਆਪ-ਬੀਤੀ
ਅਦਿਆਨੀ ਪਿੰਡ ਦੇ ਵਸਨੀਕ ਬਾਬਾਗਾਨਾ ਸ਼ੈਟੀਮਾ ਨੇ ਕਿਹਾ ਕਿ ਮ੍ਰਿਤਕਾਂ ਵਿੱਚ ਪਿੰਡ ਵਾਸੀ ਅਤੇ ਗਰਬੀ (ਯੋਬੇ) ਖੇਤਰ ਦੇ ਵਸਨੀਕ ਦੋਵੇਂ ਸ਼ਾਮਲ ਸਨ। ਉਨ੍ਹਾਂ ਕਿਹਾ, “ਜਦੋਂ ਕਿਸ਼ਤੀ ਲੰਬੇ ਸਮੇਂ ਤੱਕ ਨਹੀਂ ਪਹੁੰਚੀ, ਤਾਂ ਪਰਿਵਾਰ ਨੂੰ ਸ਼ੱਕ ਹੋਇਆ ਅਤੇ ਉਨ੍ਹਾਂ ਨੇ ਭਾਲ ਸ਼ੁਰੂ ਕਰ ਦਿੱਤੀ। ਬਾਅਦ ਵਿੱਚ, ਪਤਾ ਲੱਗਾ ਕਿ ਕਿਸ਼ਤੀ ਰਸਤੇ ਵਿੱਚ ਪਲਟ ਗਈ ਸੀ। ਗੋਤਾਖੋਰਾਂ ਨੇ ਕਈ ਲਾਸ਼ਾਂ ਬਰਾਮਦ ਕੀਤੀਆਂ।”
ਨਾਈਜੀਰੀਆ ਵਿੱਚ ਆਮ ਹਨ ਅਜਿਹੇ ਹਾਦਸੇ
ਨਾਈਜੀਰੀਆ ਵਿੱਚ ਇਸ ਤਰ੍ਹਾਂ ਦੇ ਕਿਸ਼ਤੀ ਹਾਦਸੇ ਆਮ ਹਨ ਕਿਉਂਕਿ ਕਿਸ਼ਤੀਆਂ ਵਿੱਚ ਸੁਰੱਖਿਆ ਉਪਕਰਣਾਂ ਦੀ ਘਾਟ ਹੁੰਦੀ ਹੈ, ਓਵਰਲੋਡ ਹੁੰਦੇ ਹਨ ਅਤੇ ਨਿਯਮਾਂ ਨੂੰ ਅਣਦੇਖਾ ਕੀਤਾ ਜਾਂਦਾ ਹੈ। ਸਤੰਬਰ ਦੇ ਸ਼ੁਰੂ ਵਿੱਚ, ਨਾਈਜੀਰੀਆ ਦੇ ਨਾਈਜਰ ਰਾਜ ਵਿੱਚ ਇੱਕ ਓਵਰਲੋਡ ਕਿਸ਼ਤੀ ਇੱਕ ਦਰੱਖਤ ਦੇ ਟੁੰਡ ਨਾਲ ਟਕਰਾ ਗਈ ਅਤੇ ਡੁੱਬ ਗਈ, ਜਿਸ ਵਿੱਚ ਘੱਟੋ-ਘੱਟ 60 ਲੋਕ ਮਾਰੇ ਗਏ ਸਨ।
