ਕੋਲਕਾਤਾ : ਪੱਛਮੀ ਬੰਗਾਲ ਦੀ ਰਾਜਧਾਨੀ ਕੋਲਕਾਤਾ ਵਿੱਚ ਅੱਜ ਸਵੇਰੇ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ। ਝਟਕੇ 10:10 ਮਿੰਟ ‘ਤੇ ਆਏ ਤੇ ਰਿਕਟਰ ਸਕੇਲ ‘ਤੇ ਇਹਨਾਂ ਦੀ ਤੀਬਰਤਾ 5.6 ਮਾਪੀ ਗਈ। ਭੁਚਾਲ ਦਾ ਕੇਂਦਰ ਗੁਆਂਢੀ ਦੇਸ਼ ਬੰਗਲਾਦੇਸ਼ ਦੇ ਟੁੰਗੀ ਵਿੱਚ ਸੀ। ਝਟਕੇ ਮਹਿਸੂਸ ਹੋਣ ਤੋਂ ਬਾਅਦ ਸ਼ਹਿਰ ਦੇ ਲੋਕ ਆਪਣੇ ਘਰਾਂ ਤੋਂ ਬਾਹਰ ਆ ਗਏ ਤੇ ਖੁੱਲ੍ਹੀ ਥਾਂ ‘ਤੇ ਇਕੱਠੇ ਹੋਏ।
ਨੈਸ਼ਨਲ ਸੈਂਟਰ ਫ਼ਾਰ ਸੀਸਮੋਲੋਜੀ ਮੁਤਾਬਕ, ਭੁਚਾਲ ਦੇ ਝਟਕੇ ਕੋਲਕਾਤਾ, ਆਲੇ-ਦੁਆਲੇ ਦੇ ਜ਼ਿਲ੍ਹਿਆਂ ਅਤੇ ਉੱਤਰੀ ਬੰਗਾਲ ਵਿੱਚ ਵੀ ਮਹਿਸੂਸ ਕੀਤੇ ਗਏ। ਖ਼ਾਸਕਰ ਕੂਚਬਿਹਾਰ ਅਤੇ ਦਿਨਾਜਪੁਰ ਵਿੱਚ ਤੇਜ਼ ਕੰਬਣੀ ਆਈ। ਹਾਲਾਂਕਿ ਰਾਜ ਭਰ ਵਿੱਚੋਂ ਕਿਸੇ ਵੀ ਤਰ੍ਹਾਂ ਦੇ ਜਾਨ-ਮਾਲ ਦੇ ਨੁਕਸਾਨ ਦੀ ਖ਼ਬਰ ਨਹੀਂ ਹੈ।
