ਮੁੰਬਈ : ਥੀਏਟਰ ਅਦਾਕਾਰਾ ਅਦਿਤੀ ਮੁਖਰਜੀ ਦੀ ਇੱਕ ਦਰਦਨਾਕ ਸੜਕ ਹਾਦਸੇ ਵਿੱਚ ਮੌਤ ਹੋ ਗਈ ਹੈ। ਇਸ ਘਟਨਾ ਨਾਲ ਉਨ੍ਹਾਂ ਦੇ ਪਰਿਵਾਰ ਅਤੇ ਥੀਏਟਰ ਜਗਤ ਵਿੱਚ ਸੋਗ ਦੀ ਲਹਿਰ ਛਾਅ ਗਈ ਹੈ।
ਕਿਵੇਂ ਵਾਪਰਿਆ ਹਾਦਸਾ?
ਅਦਿਤੀ ਮੁਖਰਜੀ ਅੱਜ , 19 ਨਵੰਬਰ 2025 ਨੂੰ ਇੱਕ ਥੀਏਟਰ ਪ੍ਰੋਗਰਾਮ ਵਿੱਚ ਸ਼ਾਮਲ ਹੋਣ ਲਈ ਆਪਣੇ ਘਰ ਦਿੱਲੀ ਦੇ ਮਹੀਪਾਲਪੁਰ ਤੋਂ ਨੋਇਡਾ ਦੀ ਗੌਤਮ ਬੁੱਧ ਯੂਨੀਵਰਸਿਟੀ ਲਈ ਕੈਬ ਰਾਹੀਂ ਨਿਕਲੇ ਸਨ। ਰਸਤੇ ਵਿੱਚ ਉਨ੍ਹਾਂ ਦੀ ਕੈਬ ਨੂੰ ਇੱਕ ਤੇਜ਼ ਰਫ਼ਤਾਰ ਵਾਹਨ ਨੇ ਟੱਕਰ ਮਾਰ ਦਿੱਤੀ। ਇਸ ਭਿਆਨਕ ਹਾਦਸੇ ਵਿੱਚ ਅਦਿਤੀ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਏ। ਜ਼ਖਮੀ ਹਾਲਤ ਵਿੱਚ ਉਨ੍ਹਾਂ ਨੂੰ ਗ੍ਰੇਟਰ ਨੋਇਡਾ ਦੇ ਸ਼ਾਰਦਾ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ, ਪਰ ਇਲਾਜ ਦੌਰਾਨ ਡਾਕਟਰ ਉਨ੍ਹਾਂ ਦੀ ਜਾਨ ਨਹੀਂ ਬਚਾ ਸਕੇ ਅਤੇ ਅਦਿਤੀ ਦੀ ਮੌਤ ਹੋ ਗਈ। ਥੀਏਟਰ ਪ੍ਰੋਗਰਾਮ ਵਿੱਚ ਸ਼ਾਮਲ ਕਲਾਕਾਰਾਂ ਨੂੰ ਜਦੋਂ ਇਹ ਦੁਖਦ ਖ਼ਬਰ ਮਿਲੀ, ਤਾਂ ਉਨ੍ਹਾਂ ਨੇ ਪ੍ਰੋਗਰਾਮ ਦੇ ਦੌਰਾਨ ਹੀ ਅਦਿਤੀ ਨੂੰ ਸ਼ਰਧਾਂਜਲੀ ਵੀ ਭੇਟ ਕੀਤੀ।
ਮੌਤ ਦਾ ਕਾਰਨ ਅਤੇ ਪਰਿਵਾਰ
ਅਦਿਤੀ ਦੇ ਸਿਰ ‘ਤੇ ਗੰਭੀਰ ਸੱਟ ਲੱਗੀ ਸੀ, ਜਿਸ ਕਾਰਨ ਉਨ੍ਹਾਂ ਦਾ ਦੇਹਾਂਤ ਹੋਇਆ। ਅਦਿਤੀ ਦਿੱਲੀ ਦੇ ਮਹੀਪਾਲਪੁਰ ਵਿੱਚ ਆਪਣੇ ਭਰਾ ਅਰਿਦਮ ਮੁਖਰਜੀ ਨਾਲ ਰਹਿੰਦੇ ਸਨ। ਉਨ੍ਹਾਂ ਦਾ ਮੂਲ ਘਰ ਓਡੀਸ਼ਾ ਵਿੱਚ ਹੈ। ਬੇਟੀ ਦੀ ਮੌਤ ਦੀ ਖ਼ਬਰ ਸੁਣ ਕੇ ਉਨ੍ਹਾਂ ਦੇ ਮਾਤਾ-ਪਿਤਾ ਵੀ ਓਡੀਸ਼ਾ ਤੋਂ ਦਿੱਲੀ ਪਹੁੰਚ ਚੁੱਕੇ ਹਨ।
ਆਸ਼ੂਤੋਸ਼ ਰਾਣਾ ਨਾਲ ਕਰ ਰਹੇ ਸਨ ਕੰਮ
ਅਦਿਤੀ ਮੁਖਰਜੀ ਅਸਮਿਤਾ ਥੀਏਟਰ ਦੀ 2022 ਬੈਚ ਦੀ ਇੱਕ ਪ੍ਰਤਿਭਾਸ਼ਾਲੀ ਸਾਬਕਾ ਵਿਦਿਆਰਥਣ ਸਨ। ਅਸਮਿਤਾ ਥੀਏਟਰ ਦੇ ਡਾਇਰੈਕਟਰ ਅਰਵਿੰਦ ਗੌਰ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ‘ਤੇ ਪੋਸਟ ਸ਼ੇਅਰ ਕਰਕੇ ਅਦਿਤੀ ਦੇ ਦੇਹਾਂਤ ਦੀ ਖ਼ਬਰ ਦਿੱਤੀ। ਅਰਵਿੰਦ ਗੌਰ ਨੇ ਦੱਸਿਆ ਕਿ ਅਦਿਤੀ ਇਨ੍ਹੀਂ ਦਿਨੀਂ ਬਾਲੀਵੁੱਡ ਅਦਾਕਾਰ ਆਸ਼ੂਤੋਸ਼ ਰਾਣਾ ਅਤੇ ਰਾਹੁਲ ਭੂਚਰ ਦੇ ਨਾਟਕ ‘ਹਮਾਰੇ ਰਾਮ’ ਵਿੱਚ ਕੰਮ ਕਰ ਰਹੇ ਸਨ। ਅਦਿਤੀ ਦਾ ਜਾਣਾ ਥੀਏਟਰ ਜਗਤ ਲਈ ਇੱਕ ਦੁਖਦ ਖ਼ਬਰ ਹੈ।
