ਨਵੀਂ ਦਿੱਲੀ : ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਦੇਸ਼ ਦੀ ਸੁਰੱਖਿਆ ਨੂੰ ਲੈ ਕੇ ਬਿਆਨ ਦਿਤਾ ਹੈ। ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਕਿਹਾ, ਸੁਰੱਖਿਆ ਦੇ ਮੋਰਚੇ ‘ਤੇ ਭਾਰਤ ਬਹੁਤ ਖੁਸ਼ਕਿਸਮਤ ਦੇਸ਼ ਨਹੀਂ ਹੈ। ਸਾਡੀ ਸੈਨਾ ਉੱਤਰੀ ਅਤੇ ਪੱਛਮੀ ਸਰਹੱਦਾਂ ‘ਤੇ ਲਗਾਤਾਰ ਚੁਣੌਤੀਆਂ ਦਾ ਸਾਹਮਣਾ ਕਰ ਰਹੀ ਹੈ। ਅਸੀਂ ਚੁੱਪ ਅਤੇ ਬੇਫਿਕਰ ਹੋ ਕੇ ਨਹੀਂ ਬੈਠ ਸਕਦੇ। ਸਾਡੇ ਦੁਸ਼ਮਣ ਭਾਵੇਂ ਅੰਦਰ ਹੋਣ ਜਾਂ ਬਾਹਰ, ਹਮੇਸ਼ਾ ਸਰਗਰਮ ਰਹਿੰਦੇ ਹਨ।
ਰਾਜਨਾਥ ਸਿੰਘ ਨੇ ਅੱਗੇ ਕਿਹਾ ਕਿ ਇਨ੍ਹਾਂ ਹਾਲਾਤਾਂ ‘ਚ ਸਾਨੂੰ ਉਨ੍ਹਾਂ ਦੀਆਂ ਗਤੀਵਿਧੀਆਂ ‘ਤੇ ਤਿੱਖੀ ਨਜ਼ਰ ਰੱਖਣੀ ਚਾਹੀਦੀ ਹੈ। ਉਨ੍ਹਾਂ ਵਿਰੁੱਧ ਸਹੀ ਸਮੇਂ ‘ਤੇ ਬਿਹਤਰ ਅਤੇ ਪ੍ਰਭਾਵਸ਼ਾਲੀ ਕਦਮ ਚੁੱਕੇ ਜਾਣੇ ਚਾਹੀਦੇ ਹਨ। ਰੱਖਿਆ ਮੰਤਰੀ ਨੇ ਇਹ ਗੱਲਾਂ ਮੱਧ ਪ੍ਰਦੇਸ਼ ਦੇ ਇੰਦੌਰ ਜ਼ਿਲ੍ਹੇ ਵਿੱਚ ਫ਼ੌਜ ਦੇ ਜਵਾਨਾਂ ਨੂੰ ਸੰਬੋਧਨ ਕਰਦਿਆਂ ਕਹੀਆਂ।
ਰਾਜਨਾਥ ਦੋ ਦਿਨਾਂ ਦੌਰੇ ‘ਤੇ ਮਹੂ ਛਾਉਣੀ ਆਏ ਹਨ। ਅੱਜ ਦੌਰੇ ਦਾ ਦੂਜਾ ਦਿਨ ਹੈ। ਭਾਰਤ ਦੀ ਚੀਨ ਨਾਲ 3 ਹਜ਼ਾਰ 488 ਕਿਲੋਮੀਟਰ ਲੰਬੀ ਸਰਹੱਦ ਹੈ, ਜਿਸ ਨੂੰ ਪੂਰਬੀ, ਮੱਧ ਅਤੇ ਪੱਛਮੀ ਤਿੰਨ ਖੇਤਰਾਂ ਵਿੱਚ ਵੰਡਿਆ ਗਿਆ ਹੈ। ਪੂਰਬੀ ਸੈਕਟਰ ਵਿੱਚ, ਸਿੱਕਮ ਅਤੇ ਅਰੁਣਾਚਲ ਪ੍ਰਦੇਸ਼ ਚੀਨ ਨਾਲ ਸਰਹੱਦ ਸਾਂਝੀ ਕਰਦੇ ਹਨ, ਜਿਸਦੀ ਲੰਬਾਈ 1 ਹਜ਼ਾਰ 346 ਕਿਲੋਮੀਟਰ ਹੈ। ਮੱਧ ਸੈਕਟਰ ਵਿੱਚ ਹਿਮਾਚਲ ਅਤੇ ਉੱਤਰਾਖੰਡ ਸ਼ਾਮਲ ਹਨ, ਜਿਨ੍ਹਾਂ ਦੀ ਲੰਬਾਈ 545 ਕਿਲੋਮੀਟਰ ਹੈ। ਅਤੇ ਲੱਦਾਖ ਪੱਛਮੀ ਸੈਕਟਰ ਵਿੱਚ ਆਉਂਦਾ ਹੈ, ਜਿਸ ਨਾਲ ਚੀਨ ਦੀ 1 ਹਜ਼ਾਰ 597 ਕਿਲੋਮੀਟਰ ਲੰਬੀ ਸਰਹੱਦ ਹੈ।
