Sports News : ਇੰਗਲੈਂਡ ਦੇ ਮਹਾਨ ਅੰਪਾਇਰ ਡਿੱਕੀ ਬਰਡ ਦਾ 92 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ ਹੈ। ਯੌਰਕਸ਼ਾਇਰ ਕਾਉਂਟੀ ਕ੍ਰਿਕਟ ਕਲੱਬ ਨੇ ਅੱਜ ਇਸਦੀ ਪੁਸ਼ਟੀ ਕੀਤੀ। ਹੈਰੋਲਡ ਬਰਡ, ਜਿਸਨੂੰ ਡਿੱਕੀ ਦੇ ਨਾਮ ਨਾਲ ਵੀ ਜਾਣਿਆ ਜਾਦਾ ਹੈ, 1973 ਤੋਂ 1996 ਤੱਕ ਅੰਤਰਰਾਸ਼ਟਰੀ ਮੈਚਾਂ ਵਿੱਚ ਅੰਪਾਇਰਿੰਗ ਕਰਨ ਵਾਲੇ ਦੁਨੀਆ ਦੇ ਸਭ ਤੋਂ ਮਸ਼ਹੂਰ ਅੰਪਾਇਰ ਰਹੇ।
ਸੋਸ਼ਲ ਮੀਡੀਆ ‘ਤੇ ਯੌਰਕਸ਼ਾਇਰ ਕਾਉਂਟੀ ਕ੍ਰਿਕਟ ਕਲੱਬ ਨੇ ਲਿਖਿਆ, ”ਯੌਰਕਸ਼ਾਇਰ ਕਾਉਂਟੀ ਕ੍ਰਿਕਟ ਕਲੱਬ ਹੈਰੋਲਡ ਡੇਨਿਸ ਡਿੱਕੀ ਬਰਡ ਦੇ ਦੇਹਾਂਤ ਦਾ ਐਲਾਨ ਕਰਦਾ ਹੈ। ਜੋ ਕਿ ਕ੍ਰਿਕਟ ਦੀ ਸਭ ਤੋਂ ਪਿਆਰੀ ਸ਼ਖਸੀਅਤਾਂ ਵਿੱਚੋਂ ਇੱਕ ਸਨ, ਜਿਨ੍ਹਾਂ ਦਾ ਦੇਹਾਂਤ 92 ਸਾਲ ਦੀ ਉਮਰ ਵਿੱਚ ਘਰ ‘ਤੇ ਹੋਇਆ ਹੈ।”
ਕਲੱਬ ਨੇ ਆਪਣੇ ਜਾਰੀ ਬਿਆਨ ਵਿੱਚ, ਕਿਹਾ, “ਯੌਰਕਸ਼ਾਇਰ ਕਾਉਂਟੀ ਕ੍ਰਿਕਟ ਕਲੱਬ ਦੇ ਹਰ ਕਿਸੇ ਦੇ ਵਿਚਾਰ ਇਸ ਸਮੇਂ ਡਿੱਕੀ ਦੇ ਪਰਿਵਾਰ ਅਤੇ ਦੋਸਤਾਂ ਦੇ ਨਾਲ ਹਨ। ਕਲੱਬ ਦੇ ਹਰ ਕਿਸੇ ਨੂੰ ਉਨ੍ਹਾਂ ਦੀ ਯਾਦ ਆਵੇਗੀ, ਜਿਸਨੇ ਇੱਥੇ ਹਰ ਕਿਸੇ ਦਾ ਸਮਰਥਨ ਕਰਨ ਵਿੱਚ ਇੱਕ ਸ਼ਾਨਦਾਰ ਸਮਾਂ ਬਿਤਾਇਆ, ਅਤੇ ਉਨ੍ਹਾਂ ਨੂੰ ਯੌਰਕਸ਼ਾਇਰ ਦੇ ਇਤਿਹਾਸ ਦੇ ਸਭ ਤੋਂ ਮਹਾਨ ਅੰਪਾਇਰਾਂ ਵਿੱਚੋਂ ਇੱਕ ਵਜੋਂ ਯਾਦ ਕੀਤਾ ਜਾਵੇਗਾ।”
ਇੰਗਲੈਂਡ ਅਤੇ ਵੇਲਜ਼ ਕ੍ਰਿਕਟ ਬੋਰਡ ਨੇ ਵੀ ਉਨ੍ਹਾਂ ਦੀ ਮੌਤ ‘ਤੇ ਸੋਗ ਪ੍ਰਗਟ ਕਰਦੇ ਹੋਏ ਕਿਹਾ, “ਈ.ਸੀ.ਬੀ. ਦੇ ਹਰ ਕੋਈ ਡਿੱਕੀ ਬਰਡ ਦੇ ਦੇਹਾਂਤ ਬਾਰੇ ਸੁਣ ਕੇ ਬਹੁਤ ਦੁਖੀ ਹੈ।”
ਜੈਫਰੀ ਬਾਈਕਾਟ ਦੇ ਨਾਲ ਖੇਡਿਆ ਕਲੱਬ ਕ੍ਰਿਕਟ
ਅਪ੍ਰੈਲ 1933 ਵਿੱਚ ਬਾਰਨਸਲੇ ਵਿੱਚ ਜਨਮੇ, ਡਿਕੀ ਬਰਡ ਨੇ ਟੀ.ਵੀ. ਆਈਕਨ ਮਾਈਕਲ ਪਾਰਕਿੰਸਨ ਅਤੇ ਇੰਗਲੈਂਡ ਦੇ ਜੈਫਰੀ ਬਾਈਕਾਟ ਨਾਲ ਕਲੱਬ ਕ੍ਰਿਕਟ ਖੇਡਿਆ। ਉਨ੍ਹਾਂ ਨੇ ਯੌਰਕਸ਼ਾਇਰ ਅਤੇ ਲੈਸਟਰਸ਼ਾਇਰ ਲਈ ਪਹਿਲੀ ਸ਼੍ਰੇਣੀ ਕ੍ਰਿਕਟ ਖੇਡਿਆ, ਪਰ ਇੱਕ ਅੰਪਾਇਰ ਵਜੋਂ ਆਪਣੇ ਕਰੀਅਰ ਲਈ ਸਭ ਤੋਂ ਵੱਧ ਜਾਣਿਆ ਜਾਂਦਾ ਹੈ।
ਉਨ੍ਹਾਂ ਨੇ 1970 ਵਿੱਚ ਕਾਉਂਟੀ ਪੱਧਰ ‘ਤੇ ਅੰਪਾਇਰਿੰਗ ਸ਼ੁਰੂ ਕੀਤੀ ਅਤੇ 1973 ਵਿੱਚ ਹੈਡਿੰਗਲੇ ਵਿੱਚ ਆਪਣੇ ਪਹਿਲੇ ਟੈਸਟ ਮੈਚ, ਇੰਗਲੈਂਡ ਬਨਾਮ ਨਿਊਜ਼ੀਲੈਂਡ ਮੈਚ ਵਿੱਚ ਅੰਪਾਇਰਿੰਗ ਕੀਤੀ। ਪ੍ਰਸਿੱਧ ਅੰਪਾਇਰ, ਡਿਕੀ ਬਰਡ ਨੇ 1973-96 ਤੱਕ ਕੁੱਲ 66 ਟੈਸਟ ਅਤੇ 1973-95 ਤੱਕ 69 ਇੱਕ ਦਿਨਾ ਅੰਤਰਰਾਸ਼ਟਰੀ ਮੈਚਾਂ ਵਿੱਚ ਅੰਪਾਇਰਿੰਗ ਕੀਤੀ। ਕ੍ਰਿਕਟ ਦੀ ਦੁਨੀਆ ਵਿੱਚ ਉਸਦੀ ਪ੍ਰਸਿੱਧੀ ਦਾ ਅੰਦਾਜ਼ਾ ਇਸ ਤੱਥ ਤੋਂ ਲਗਾਇਆ ਜਾ ਸਕਦਾ ਹੈ ਕਿ 1996 ਵਿੱਚ ਆਪਣੇ ਆਖ਼ਰੀ ਟੈਸਟ ਤੋਂ ਪਹਿਲਾਂ ਡਿੱਕੀ ਬਰਡ ਨੂੰ ਇੰਗਲੈਂਡ ਅਤੇ ਭਾਰਤ ਦੇ ਖਿਡਾਰੀਆਂ ਵੱਲੋਂ ਲਾਰਡਸ ਵਿੱਚ ਗਾਰਡ ਆਫ਼ ਆਨਰ ਦਿੱਤਾ ਗਿਆ ਸੀ।
