ਅਮਰੀਕਾ ਦਾ ਭਾਰਤੀਆਂ ਨੂੰ ਵੱਡਾ ਝਟਕਾ , ਵੀਜ਼ਾ ਨਿਯਮਾਂ ‘ਚ ਕੀਤਾ ਵੱਡਾ ਬਦਲਾਅ

ਅਮਰੀਕਾ: ਅਮਰੀਕਾ ਨੇ ਭਾਰਤੀਆਂ ਨੂੰ ਵੱਡਾ ਝਟਕਾ ਦਿੱਤਾ ਹੈ। ਹੁਣ ਅਮਰੀਕਾ ਦੇ ਗੈਰ-ਪ੍ਰਵਾਸੀ ਵੀਜ਼ਾ (NIV) ਲਈ ਇੰਟਰਵਿਊ ਤੁਹਾਡੇ ਆਪਣੇ ਦੇਸ਼ ਜਾਂ ਕਾਨੂੰਨੀ ਰਿਹਾਇਸ਼ ਸਥਾਨ ‘ਤੇ ਦੇਣਾ ਪਵੇਗਾ। ਯਾਨੀ ਜੇਕਰ ਤੁਸੀਂ ਭਾਰਤੀ ਨਾਗਰਿਕ ਹੋ ਅਤੇ ਜਲਦੀ ਹੀ ਅਮਰੀਕਾ ਜਾਣਾ ਚਾਹੁੰਦੇ ਹੋ, ਤਾਂ ਤੁਸੀਂ ਪਹਿਲਾਂ ਵਾਂਗ ਥਾਈਲੈਂਡ, ਸਿੰਗਾਪੁਰ ਜਾਂ ਜਰਮਨੀ ਵਰਗੇ ਦੇਸ਼ਾਂ ਵਿੱਚ ਜਾ ਕੇ ਸੈਲਾਨੀ (B1) ਜਾਂ ਕਾਰੋਬਾਰੀ (B2) ਵੀਜ਼ਾ ਲਈ ਇੰਟਰਵਿਊ ਨਹੀਂ ਦੇ ਸਕੋਗੇ। ਇਹ ਨਵਾਂ ਨਿਯਮ 2 ਸਤੰਬਰ ਤੋਂ ਲਾਗੂ ਹੋ ਗਿਆ ਹੈ।

ਕਿਉਂ ਦਿੱਤੀ ਗਈ ਇਹ ਛੋਟ ?
ਕੋਰੋਨਾ ਮਹਾਂਮਾਰੀ ਦੌਰਾਨ, ਭਾਰਤ ਵਿੱਚ ਅਮਰੀਕੀ ਵੀਜ਼ਾ ਇੰਟਰਵਿਊ ਲਈ ਲੰਮਾ ਇੰਤਜ਼ਾਰ ਕਰਨਾ ਪੈਂਦਾ ਸੀ, ਜਿਸ ਵਿੱਚ ਕਈ ਵਾਰ ਤਿੰਨ ਸਾਲ ਤੱਕ ਲੱਗ ਜਾਂਦੇ ਸਨ। ਉਸ ਸਮੇਂ, ਬਹੁਤ ਸਾਰੇ ਭਾਰਤੀ ਨਾਗਰਿਕ ਬੈਂਕਾਕ, ਸਿੰਗਾਪੁਰ ਜਾਂ ਫਰੈਂਕਫਰਟ ਵਰਗੇ ਦੂਜੇ ਦੇਸ਼ਾਂ ਵਿੱਚ ਜਾ ਕੇ ਜਲਦੀ ਵੀਜ਼ਾ ਪ੍ਰਾਪਤ ਕਰਦੇ ਸਨ ਅਤੇ ਕੰਮ ਪੂਰਾ ਹੋਣ ਤੋਂ ਬਾਅਦ ਵਾਪਸ ਆ ਜਾਂਦੇ ਸਨ। ਹੁਣ ਇਹ ਸਹੂਲਤ ਖਤਮ ਕਰ ਦਿੱਤੀ ਗਈ ਹੈ।

ਨਵੇਂ ਨਿਯਮ ਦਾ ਕੀ ਹੋਵੇਗਾ ਪ੍ਰਭਾਵ ?
ਇਹ ਬਦਲਾਅ ਉਨ੍ਹਾਂ ਸਾਰਿਆਂ ‘ਤੇ ਲਾਗੂ ਹੋਵੇਗਾ ਜੋ ਸੈਲਾਨੀ, ਕਾਰੋਬਾਰੀ, ਵਿਦਿਆਰਥੀ ਜਾਂ ਅਸਥਾਈ ਵਰਕਰ ਵੀਜ਼ਾ ਲਈ ਅਰਜ਼ੀ ਦੇ ਰਹੇ ਹਨ। ਡੋਨਾਲਡ ਟਰੰਪ ਦੇ ਦੂਜੇ ਕਾਰਜਕਾਲ ਵਿੱਚ ਵੀਜ਼ਾ ਨਿਯਮਾਂ ਨੂੰ ਲਗਾਤਾਰ ਸਖ਼ਤ ਕੀਤਾ ਜਾ ਰਿਹਾ ਹੈ ਅਤੇ ਇਸ ਫ਼ੈਸਲੇ ਨੂੰ ਉਸੇ ਦਾ ਇੱਕ ਹਿੱਸਾ ਮੰਨਿਆ ਜਾ ਰਿਹਾ ਹੈ।

ਭਾਰਤ ਵਿੱਚ ਹੁਣ ਕਿੰਨਾ ਸਮਾਂ ਹੈ ਇੰਤਜ਼ਾਰ ?
ਅਮਰੀਕੀ ਵਿਦੇਸ਼ ਵਿਭਾਗ ਦੀ ਵੈੱਬਸਾਈਟ ਦੇ ਅਨੁਸਾਰ, ਭਾਰਤ ਵਿੱਚ ਵੀਜ਼ਾ ਇੰਟਰਵਿਊ ਲਈ ਉਡੀਕ ਸਮਾਂ ਵੱਖ-ਵੱਖ ਸ਼ਹਿਰਾਂ ਵਿੱਚ ਵੱਖਰਾ ਹੈ:

➤ ਹੈਦਰਾਬਾਦ ਅਤੇ ਮੁੰਬਈ: 3.5 ਮਹੀਨੇ

➤ ਦਿੱਲੀ: 4.5 ਮਹੀਨੇ

➤ ਕੋਲਕਾਤਾ: 5 ਮਹੀਨੇ

➤ ਚੇਨਈ: 9 ਮਹੀਨੇ

ਕਿਸਨੂੰ ਮਿਲੇਗੀ ਛੋਟ ?
ਕੁਝ ਮਾਮਲਿਆਂ ਵਿੱਚ, ਇੰਟਰਵਿਊ ਤੋਂ ਛੋਟ ਹਾਲੇ ਵੀ ਉਪਲਬਧ ਰਹੇਗੀ। ਜੇਕਰ ਤੁਹਾਡਾ B1, B2 ਜਾਂ B1/B2 ਵੀਜ਼ਾ ਪਿਛਲੇ 12 ਮਹੀਨਿਆਂ ਵਿੱਚ ਖਤਮ ਹੋ ਗਿਆ ਹੈ ਅਤੇ ਤੁਹਾਡੀ ਉਮਰ 18 ਸਾਲ ਜਾਂ ਇਸ ਤੋਂ ਵੱਧ ਹੈ, ਤਾਂ ਕੁਝ ਮਾਮਲਿਆਂ ਵਿੱਚ ਤੁਹਾਨੂੰ ਇੰਟਰਵਿਊ ਦੇਣ ਦੀ ਲੋੜ ਨਹੀਂ ਹੋਵੇਗੀ।