ਬਟਾਲਾ: ਉੱਤਰੀ ਭਾਰਤ ਵਿੱਚ ਪਿਛਲੇ ਕਈ ਦਿਨਾਂ ਤੋਂ ਹੋ ਰਹੀ ਲਗਾਤਾਰ ਬਾਰਿਸ਼ ਨੇ ਕਈ ਰਾਜਾਂ ਵਿੱਚ ਤਬਾਹੀ ਮਚਾਈ ਹੋਈ ਹੈ। ਖਾਸ ਕਰਕੇ ਹਿਮਾਚਲ ਰਾਜ ਵਿੱਚ ਹੜ੍ਹਾਂ ਕਾਰਨ ਕਈ ਸੜਕਾਂ ਪਾਣੀ ‘ਚ ਵਹਿ ਗਈਆਂ ਹਨ। ਅਜਿਹੇ ‘ਚ ਹਿਮਾਚਲ ਅਤੇ ਪੰਜਾਬ ਦੀਆਂ ਦਰਜਨਾਂ ਮੁੱਖ ਸੜਕਾਂ ਦੇ ਸੰਪਰਕ ਟੁੱਟਣ ਕਾਰਨ ਜ਼ਿਆਦਾਤਰ ਸਬਜ਼ੀਆਂ ਖਾਸ ਕਰਕੇ ਟਮਾਟਰ (tomato) ਅਤੇ ਆਚਾਰੀ ਅੰਬਾਂ ਦੇ ਭਾਅ ਅਸਮਾਨੀ ਚੜ੍ਹ ਗਿਆ ਹੈ।
ਇਸੇ ਦੌਰਾਨ ਬਟਾਲਾ ‘ਚ ਜੁੱਤੀਆਂ ਦੇ ਦੁਕਾਨਦਾਰ ਨੇ ਵੱਖਰਾ ਸੇਲ ਲਗਾਇਆ ਹੈ, ਜਿਸ ਨੂੰ ਦੇਖ ਕੇ ਹਰ ਕੋਈ ਹੈਰਾਨ ਹੈ। ਦਰਅਸਲ, ਦੁਕਾਨ ਦੇ ਬਾਹਰ ਇੱਕ ਵੱਡਾ ਪੋਸਟਰ ਲਗਾਇਆ ਗਿਆ ਹੈ ਕਿ ਟਮਾਟਰ ਮੁਫਤ ਵਿੱਚ ਮਿਲਦੇ ਹਨ…! ਦੁਕਾਨਦਾਰਾਂ ਅਨੁਸਾਰ ਗਾਹਕਾਂ ਦੀ ਰਸੋਈ ਦੀ ਖੱਜਲ-ਖੁਆਰੀ ਨੂੰ ਦੂਰ ਕਰਨ ਦੇ ਮਕਸਦ ਨਾਲ 1000 ਤੋਂ 1500 ਜੁੱਤੀਆਂ ਜਾਂ ਬੂਟਾਂ ਦੀ ਖਰੀਦ ‘ਤੇ 2 ਕਿਲੋ ਟਮਾਟਰ ਮੁਫ਼ਤ ਦਿੱਤੇ ਜਾਣਗੇ। ਉਪਰੋਕਤ ਆਫਰ ਦੇਣ ਦਾ ਕਾਰਨ ਦੱਸਦੇ ਹੋਏ ਦੁਕਾਨ ਮਾਲਕ ਦਾ ਕਹਿਣਾ ਹੈ ਕਿ ਇਸ ਤਰ੍ਹਾਂ ਗਾਹਕ ਆ ਕੇ 200 ਰੁਪਏ ‘ਚ ਵਿਕਣ ਵਾਲਾ ਟਮਾਟਰ ਮੁਫਤ ਲੈ ਜਾਵੇਗਾ।