ਹਿਸਾਰ: ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸੈਣੀ (Chief Minister Naib Saini) ਨੇ ਬੀਤੇ ਦਿਨ ਹਿਸਾਰ ਦੇ ਅਗਰੋਹਾ ਦਾ ਦੌਰਾ ਕੀਤਾ, ਜਿੱਥੇ ਉਨ੍ਹਾਂ ਨੇ ਮਹਾਰਾਜਾ ਅਗਰਸੇਨ ਮੈਡੀਕਲ ਕਾਲਜ (Maharaja Agarsen Medical College) ਵਿੱਚ ਆਯੋਜਿਤ ਇੱਕ ਪ੍ਰੋਗਰਾਮ ਵਿੱਚ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ। ਇਸ ਮੌਕੇ ਉਨ੍ਹਾਂ ਨਾਲ ਆਜ਼ਾਦ ਵਿਧਾਇਕ ਸਾਵਿਤਰੀ ਜਿੰਦਲ, ਲੋਕ ਨਿਰਮਾਣ ਮੰਤਰੀ ਰਣਬੀਰ ਗੰਗਵਾ, ਸਾਬਕਾ ਰਾਜ ਸਭਾ ਮੈਂਬਰ ਡੀ.ਪੀ ਵਤਸ ਅਤੇ ਹੋਰ ਕਈ ਵਿਧਾਇਕ ਤੇ ਮੰਤਰੀ ਮੌਜੂਦ ਸਨ।
ਤੁਹਾਨੂੰ ਦੱਸ ਦੇਈਏ ਕਿ ਨਾਇਬ ਸੈਣੀ ਨੇ ਇੱਥੇ ਸਾਵਿਤਰੀ ਜਿੰਦਲ ਸਪੋਰਟਸ ਕੰਪਲੈਕਸ ਅਤੇ ਸੀਤਾ ਰਾਮ ਜਿੰਦਲ ਗਰਲ ਹੋਸਟਲ ਦਾ ਉਦਘਾਟਨ ਕੀਤਾ। ਇਸ ਤੋਂ ਇਲਾਵਾ ਮੁੱਖ ਮੰਤਰੀ ਨੇ ਅਗਰੋਹਾ ਮੈਡੀਕਲ ਕਾਲਜ ਵਿੱਚ ਕੈਂਸਰ ਹਸਪਤਾਲ ਬਣਾਉਣ ਦੀ ਮੰਗ ਨੂੰ ਪ੍ਰਵਾਨ ਕਰਦਿਆਂ ਕਿਹਾ ਕਿ ਕਾਲਜ ਜਦੋਂ ਵੀ ਦਸਤਾਵੇਜ਼ ਮੁਕੰਮਲ ਕਰਕੇ ਸਰਕਾਰ ਨੂੰ ਸੌਂਪੇਗਾ, ਉਸ ਨੂੰ ਮਨਜ਼ੂਰੀ ਦੇ ਦਿੱਤੀ ਜਾਵੇਗੀ।
ਮੈਡੀਕਲ ਕਾਲਜ ਵਿੱਚ ਆਯੋਜਿਤ ਪ੍ਰੋਗਰਾਮ ਵਿੱਚ ਬੋਲਦਿਆਂ ਮੁੱਖ ਮੰਤਰੀ ਨੇ ਕਿਹਾ ਕਿ ਹੁਣ ਐਮਰਜੈਂਸੀ ਦੀ ਸਥਿਤੀ ਵਿੱਚ ਹਰਿਆਣਾ ਸਰਕਾਰ ਡਾਕਟਰ ਨੂੰ ਘਰ ਤੋਂ ਹਸਪਤਾਲ ਬੁਲਾਉਣ ਲਈ ਵਾਹਨ ਮੁਹੱਈਆ ਕਰਵਾਏਗੀ। ਹੁਣ ਤੱਕ ਐਮਰਜੈਂਸੀ ਦੀ ਸੂਰਤ ਵਿੱਚ ਡਾਕਟਰ ਆਪਣੀਆਂ ਗੱਡੀਆਂ ਵਿੱਚ ਹਸਪਤਾਲ ਆਉਂਦੇ ਸਨ। ਅਜਿਹੇ ‘ਚ ਪਰਿਵਾਰ ਆਪਣੀ ਸੁਰੱਖਿਆ ਨੂੰ ਲੈ ਕੇ ਚਿੰਤਤ ਸਨ ਪਰ ਹੁਣ ਸਰਕਾਰ ਡਾਕਟਰਾਂ ਨੂੰ ਵਿਸ਼ੇਸ਼ ਵਾਹਨ ਮੁਹੱਈਆ ਕਰਵਾਏਗੀ। ਜੋ ਡਾਕਟਰਾਂ ਨੂੰ ਘਰੋਂ ਹਸਪਤਾਲ ਲੈ ਕੇ ਆਉਣਗੇ ਅਤੇ ਫਿਰ ਵਾਪਸ ਛੱਡਣਗੇ।
