ਜਾਪਾਨ: ਜਾਪਾਨ (Japan) ਦੇ ਮੁੱਖ ਟਾਪੂ ਹੋਨਸ਼ੂ ਦੇ ਪੱਛਮੀ ਤੱਟ ‘ਤੇ ਆਏ ਭੂਚਾਲ ਕਾਰਨ ਘੱਟੋ-ਘੱਟ 6 ਲੋਕਾਂ ਦੀ ਮੌਤ ਹੋ ਗਈ ਅਤੇ 30 ਹੋਰ ਜ਼ਖਮੀ ਹੋ ਗਏ। ਇਹ ਜਾਣਕਾਰੀ ਜਾਪਾਨੀ ਮੀਡੀਆ ਨੇ ਦਿੱਤੀ। 5.7 ਤੋਂ 7.6 ਤੀਬਰਤਾ ਦਾ ਭੂਚਾਲ (earthquake) ਸਥਾਨਕ ਸਮੇਂ ਅਨੁਸਾਰ ਸ਼ਾਮ 4 ਵਜੇ (7 ਵਜੇ GMT) ਤੋਂ ਥੋੜ੍ਹੀ ਦੇਰ ਬਾਅਦ ਇਸ਼ੀਕਾਵਾ ਪ੍ਰੀਫੈਕਚਰ ਦੇ ਨੋਟੋ ਪ੍ਰਾਇਦੀਪ ਵਿੱਚ ਆਇਆ, ਜਿਸ ਨਾਲ ਇਮਾਰਤਾਂ ਢਹਿ ਗਈਆਂ ਅਤੇ ਭੂਚਾਲ ਤੋਂ ਬਾਅਦ ਕਈ ਝਟਕੇ ਮਹਿਸੂਸ ਕੀਤੇ ਗਏ।
ਨਿਊਜ਼ ਏਜੰਸੀ ਨੇ ਦੱਸਿਆ ਕਿ ਇਸ਼ੀਕਾਵਾ ਪ੍ਰੀਫੈਕਚਰ ਵਿੱਚ ਛੇ ਲੋਕਾਂ ਦੀ ਮੌਤ ਹੋ ਗਈ ਅਤੇ ਸੱਤ ਹੋਰ ਜ਼ਖਮੀ ਹੋਏ। ਗੁਆਂਢੀ ਟੋਯਾਮਾ ਪ੍ਰੀਫੈਕਚਰ ਵਿੱਚ 15, ਫੁਕੁਈ ਪ੍ਰੀਫੈਕਚਰ ਵਿੱਚ 55, ਨਿਗਾਟਾ ਪ੍ਰੀਫੈਕਚਰ ਵਿੱਚ 2 ਅਤੇ ਗੀਫੂ ਪ੍ਰੀਫੈਕਚਰ ਵਿੱਚ ਇੱਕ ਵਿਅਕਤੀ ਜ਼ਖ਼ਮੀ ਹੋਏ ਹਨ।
ਭੂਚਾਲ ਦੇ ਝਟਕੇ ਹੋਨਸ਼ੂ ਦੇ ਪੂਰਬੀ ਤੱਟ ‘ਤੇ ਟੋਕੀਓ ਤੱਕ ਮਹਿਸੂਸ ਕੀਤੇ ਗਏ। ਭੂਚਾਲ ਨੇ ਤੇਜ਼ ਰਫਤਾਰ ਰੇਲ ਸੇਵਾਵਾਂ ਨੂੰ ਰੋਕ ਦਿੱਤਾ ਅਤੇ ਹਜ਼ਾਰਾਂ ਲੋਕਾਂ ਨੂੰ ਬਾਹਰ ਕੱਢਣ ਲਈ ਮਜਬੂਰ ਕੀਤਾ। ਹੋਕੁਰੀਕੁ ਇਲੈਕਟ੍ਰਿਕ ਪਾਵਰ ਕੰਪਨੀ ਨੇ ਕਿਹਾ ਕਿ ਇਸ਼ੀਕਾਵਾ ਵਿੱਚ ਲਗਭਗ 33,000 ਘਰ ਬਿਜਲੀ ਤੋਂ ਬਿਨਾਂ ਸਨ, ਜਨਤਕ ਪ੍ਰਸਾਰਕ NHK ਨੇ ਰਿਪੋਰਟ ਦਿੱਤੀ।
