ਜਲੰਧਰ ‘ਚ 2 ਦੁਕਾਨਾਂ ਦੇ ਥੋਕ ਤੇ ਪ੍ਰਚੂਨ ਲਾਇਸੈਂਸ ਰੱਦ

ਜਲੰਧਰ : ਡਰੱਗਜ਼ ਅਤੇ ਕਾਸਮੈਟਿਕਸ ਐਕਟ ਦੀ ਪਾਲਣਾ ਨਾ ਕਰਨ ਦੇ ਮੱਦੇਨਜ਼ਰ, ਸਹਾਇਕ ਕਮਿਸ਼ਨਰ (ਡਰੱਗਜ਼) ਕਮ ਲਾਇਸੈਂਸਿੰਗ ਅਥਾਰਟੀ ਗੁਰਬਿੰਦਰ ਸਿੰਘ ਨੇ ਕੈਪੀਟਲ ਫਾਰਮਾ ਤਿਲਕ ਨਗਰ ਦਾ ਥੋਕ ਅਤੇ ਪ੍ਰਚੂਨ ਲਾਇਸੈਂਸ ਰੱਦ ਕਰ ਦਿੱਤਾ ਹੈ। ਜਾਣਕਾਰੀ ਅਨੁਸਾਰ ਜਦੋਂ ਡਰੱਗਜ਼ ਇੰਸਪੈਕਟਰ ਨੇ 20 ਜੂਨ, 2022 ਨੂੰ ਉਕਤ ਮੈਡੀਕਲ ਹਾਲ ਦੀ ਅਚਾਨਕ ਜਾਂਚ ਕੀਤੀ ਤਾਂ ਉਸ ਸਮੇਂ ਉਨ੍ਹਾਂ ਨੂੰ ਉੱਥੇ ਇਤਰਾਜ਼ਯੋਗ ਦਵਾਈਆਂ ਮਿਲੀਆਂ ਅਤੇ ਵਿਕਰੀ-ਖਰੀਦ ਰਿਕਾਰਡ ਵੀ ਅਧੂਰਾ ਸੀ। ਇਸ ਤੋਂ ਬਾਅਦ, ਜਦੋਂ 6 ਅਗਸਤ 2024 ਨੂੰ ਉਕਤ ਦੁਕਾਨ ਦੀ ਜਾਂਚ ਕੀਤੀ ਗਈ, ਤਾਂ ਉਸ ਸਮੇਂ ਵੀ ਵਿਭਾਗ ਨੂੰ ਬਹੁਤ ਸਾਰੀਆਂ ਇਤਰਾਜ਼ਯੋਗ ਦਵਾਈਆਂ ਮਿਲੀਆਂ। ਉਸ ਸਮੇਂ, ਵਿਭਾਗ ਨੇ ਸਾਰੀਆਂ ਦਵਾਈਆਂ ਜ਼ਬਤ ਕਰ ਲਈਆਂ ਸਨ ਅਤੇ ਦੁਕਾਨ ਮਾਲਕਾਂ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤਾ ਸੀ ਅਤੇ ਜਵਾਬ ਤਸੱਲੀਬਖਸ਼ ਨਾ ਹੋਣ ਕਾਰਨ, ਉਕਤ ਦੁਕਾਨ ਦਾ ਪ੍ਰਚੂਨ ਲਾਇਸੈਂਸ 30 ਦਿਨਾਂ ਲਈ ਮੁਅੱਤਲ ਕਰ ਦਿੱਤਾ ਗਿਆ ਸੀ।

ਇਸ ਤੋਂ ਬਾਅਦ, ਇੱਕ ਵਾਰ ਫਿਰ ਜਦੋਂ ਡਰੱਗ ਇੰਸਪੈਕਟਰ ਅਮਿਤ ਬਾਂਸਲ ਨੇ ਪੁਲਿਸ ਪਾਰਟੀ ਨਾਲ 4 ਅਪ੍ਰੈਲ 2025 ਨੂੰ ਦੁਕਾਨ ਦੀ ਅਚਨਚੇਤ ਜਾਂਚ ਕੀਤੀ, ਤਾਂ ਉਸ ਸਮੇਂ ਵੀ ਉਨ੍ਹਾਂ ਨੂੰ 2,14,085 ਰੁਪਏ ਦੀਆਂ ਦਵਾਈਆਂ ਮਿਲੀਆਂ ਜੋ ਪਾਬੰਦੀਸ਼ੁਦਾ ਸਨ ਅਤੇ ਵਿਭਾਗ ਦੁਆਰਾ ਜ਼ਬਤ ਕਰ ਲਈਆਂ ਗਈਆਂ ਸਨ। ਵਿਭਾਗ ਨੇ 7 ਅਪ੍ਰੈਲ, 2025 ਨੂੰ ਉਕਤ ਦੁਕਾਨ ਦੇ ਮਾਲਕਾਂ ਨੂੰ ਨੋਟਿਸ ਜਾਰੀ ਕੀਤਾ ਸੀ, ਪਰ ਉਹ ਇਸ ਦਾ ਕੋਈ ਤਸੱਲੀਬਖਸ਼ ਜਵਾਬ ਨਹੀਂ ਦੇ ਸਕੇ ਅਤੇ ਇਸ ਕਾਰਨ ਹੁਣ ਸਹਾਇਕ ਕਮਿਸ਼ਨਰ (ਡਰੱਗਜ਼) ਕਮ ਲਾਇਸੈਂਸਿੰਗ ਅਥਾਰਟੀ ਗੁਰਬਿੰਦਰ ਸਿੰਘ ਨੇ ਡਰੱਗਜ਼ ਐਂਡ ਕਾਸਮੈਟਿਕਸ ਐਕਟ 1940 ਅਤੇ ਨਿਯਮ 1945 ਤਹਿਤ ਕਾਰਵਾਈ ਕਰਦਿਆਂ ਉਕਤ ਦੁਕਾਨ ਦਾ ਥੋਕ ਅਤੇ ਪ੍ਰਚੂਨ ਲਾਇਸੈਂਸ ਰੱਦ ਕਰ ਦਿੱਤਾ ਹੈ।