ਪੰਜਾਬ : ਪਾਵਰਕਾਮ ਨੇ ਬਿਜਲੀ ਖਪਤਕਾਰਾਂ ਨੂੰ ਵੱਡੀ ਰਾਹਤ ਦਿੰਦੇ ਹੋਏ ਨਵਾਂ ਹੁਕਮ ਜਾਰੀ ਕੀਤਾ ਹੈ। ਬੀਤੇ ਦਿਨ ਪਾਵਰਕਾਮ ਨੇ ਕਿਹਾ ਕਿ ਜਿਨ੍ਹਾਂ ਖਪਤਕਾਰਾਂ ਕੋਲ ਇਕੋ ਕਾਰੋਬਾਰ ਦੇ ਕਈ ਕੁਨੈਕਸ਼ਨ ਹਨ, ਉਨ੍ਹਾਂ ਨੂੰ ਸਾਰੇ ਕੁਨੈਕਸ਼ਨਾਂ ਦਾ ਇਕੋ ਬਿੱਲ ਮਿਲੇਗਾ। ਇਸ ਦਾ ਲਾਭ ਪ੍ਰਚੂਨ ਕਾਊਂਟਰਾਂ, ਦੂਰਸੰਚਾਰ, ਫਰੈਂਚਾਇਜ਼ੀ ਆਦਿ ਦੇ ਬਿਜਲੀ ਕੁਨੈਕਸ਼ਨ ਧਾਰਕਾਂ ਨੂੰ ਦਿੱਤਾ ਜਾਵੇਗਾ। ਖਪਤਕਾਰਾਂ ਕੋਲ ਹੁਣ ਸਾਰੇ ਕੁਨੈਕਸ਼ਨਾਂ ਦਾ ਇੱਕ ਬਿੱਲ ਲੈ ਕੇ ਇਸ ਨੂੰ ਜਮ੍ਹਾ ਕਰਨ ਦਾ ਵਿਕਲਪ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਪਾਵਰਕਾਮ ਵੱਲੋਂ ਕੰਪੋਜ਼ਿਟ ਬਿੱਲ ਪੇਮੈਂਟ ਸਕੀਮ ਦੇ ਨਾਂ ‘ਤੇ ਸਰਕੂਲਰ ਜਾਰੀ ਕੀਤਾ ਗਿਆ ਹੈ, ਜਿਸ ‘ਤੇ ਕੋਈ ਵਾਧੂ ਫੀਸ ਨਹੀਂ ਦੇਣੀ ਪਵੇਗੀ।
ਸਭ ਤੋਂ ਪਹਿਲਾਂ ਖਪਤਕਾਰ ਨੂੰ ਪਾਵਰਕਾਮ ਨੂੰ ਸੂਚਿਤ ਕਰਨਾ ਹੋਵੇਗਾ ਕਿ ਉਹ ਉਕਤ ਸਕੀਮ ਦਾ ਲਾਭ ਲੈਣਾ ਚਾਹੁੰਦਾ ਹੈ। ਇਸ ਸਬੰਧੀ ਉਹ ਪਾਵਰਕਾਮ ਦੀ ਵੈੱਬਸਾਈਟ ‘ਤੇ https://www.pspcli.n/ ਅਰਜ਼ੀ ਫਾਰਮ ਭਰਨਗੇ, ਜਿਸ ਤੋਂ ਬਾਅਦ ਉਨ੍ਹਾਂ ਨੂੰ ਪਛਾਣ ਨੰਬਰ ਮਿਲੇਗਾ। ਉਹ ਆਪਣੀ ਈ-ਮੇਲ ਆਈ.ਡੀ ਅਤੇ ਮੋਬਾਈਲ ਨੰਬਰ ਪਾਵਰਕਾਮ ਵਿੱਚ ਰਜਿਸਟਰ ਕਰੇਗਾ, ਜਿਸ ‘ਤੇ ਉਸ ਨੂੰ ਕੁਨੈਕਸ਼ਨਾਂ ਦਾ ਕੰਪੋਜ਼ਿਟ ਬਿੱਲ ਮਿਲਣਾ ਸ਼ੁਰੂ ਹੋ ਜਾਵੇਗਾ।
ਇਸ ਦੇ ਨਾਲ ਹੀ ਤੁਹਾਨੂੰ ਦੱਸ ਦੇਈਏ ਕਿ ਪੰਜਾਬ ਦੇ ਲੋਕਾਂ ਨੂੰ ਮਾਂ ਬੋਲੀ ਪੰਜਾਬੀ ਵਿੱਚ ਵੀ ਬਿਜਲੀ ਦੇ ਬਿੱਲ ਮਿਲਣੇ ਸ਼ੁਰੂ ਹੋ ਗਏ ਹਨ। ਇਸ ਤੋਂ ਪਹਿਲਾਂ ਬਿੱਲ ਸਲਿੱਪ ਸਿਰਫ ਅੰਗਰੇਜ਼ੀ ‘ਚ ਮਿਲਦੀ ਸੀ। ਹੁਣ ਵਿਭਾਗ ਵੱਲੋਂ ਅੰਗਰੇਜ਼ੀ ਦੇ ਨਾਲ-ਨਾਲ ਪੰਜਾਬੀ ਵਿੱਚ ਵੀ ਬਿੱਲ ਛਾਪੇ ਜਾ ਰਹੇ ਹਨ ਅਤੇ ਲੋਕਾਂ ਨੂੰ ਦਿੱਤੇ ਜਾ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਬਿਜਲੀ ਦੇ ਬਿੱਲ ਪੰਜਾਬੀ ‘ਚ ਜਾਰੀ ਕਰਨ ਦੀ ਮੰਗ ਵਾਲੀ ਰਿੱਟ ‘ਤੇ ਸੁਣਵਾਈ ਦੌਰਾਨ ਪੰਜਾਬ ਸਰਕਾਰ ਨੇ ਪੰਜਾਬ-ਹਰਿਆਣਾ ਹਾਈ ਕੋਰਟ ਨੂੰ ਦੱਸਿਆ ਸੀ ਕਿ ਇਹ ਪ੍ਰਣਾਲੀ 26 ਦਸੰਬਰ ਤੋਂ ਲਾਗੂ ਕਰ ਦਿੱਤੀ ਗਈ ਹੈ, ਜਦੋਂ ਕਿ ਹੁਣ ਬਿਜਲੀ ਦੇ ਬਿੱਲ ਪੰਜਾਬੀ ਅਤੇ ਅੰਗਰੇਜ਼ੀ ਦੋਵਾਂ ਭਾਸ਼ਾਵਾਂ ‘ਚ ਆ ਰਹੇ ਹਨ।
