ਅਮਿਤ ਸ਼ਾਹ ਪੀਐੱਮ ਨਰਿੰਦਰ ਮੋਦੀ ਦੇ ‘ਪ੍ਰੇਰਨਾ’ ਸਕੂਲ ਦਾ ਕਰਨਗੇ ਉਦਘਾਟਨ, 72 ਕਰੋੜ ਦੀ ਲਾਗਤ ਨਾਲ ਪੁਰਾਣੇ ਸਕੂਲ ਦਾ ਕੀਤਾ ਗਿਆ ਨਵੀਨੀਕਰਨ

ਗੁਜਰਾਤ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅੱਜ ਦੇਸ਼ ਵਿਦੇਸ਼ ਵਿਚ ਭਾਰਤ ਦਾ ਨਾਂ ਰੋਸ਼ਨ ਕਰ ਰਹੇ ਹਨ। ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਅੱਜ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਗ੍ਰਹਿ ਸ਼ਹਿਰ ਵਡਨਗਰ ਜਾਣਗੇ। ਉਹ ਪਹਿਲਾਂ ਇੱਥੇ ਬਣਾਏ ਜਾ ਰਹੇ ਮਿਊਜ਼ੀਅਮ ਦੇ ਕੰਮ ਦਾ ਜਾਇਜ਼ਾ ਲੈਣਗੇ ਅਤੇ ਫਿਰ ਪ੍ਰੇਰਨਾ ਸਕੂਲ ਦੇ ਕੈਂਪਸ ਦਾ ਉਦਘਾਟਨ ਕਰਨਗੇ।

ਇਹ ਉਹੀ ਸਕੂਲ ਹੈ ਜਿੱਥੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ 1962 ਤੋਂ 1967 ਤੱਕ 8ਵੀਂ ਤੋਂ 11ਵੀਂ ਜਮਾਤ ਤੱਕ ਪੜ੍ਹਾਈ ਕੀਤੀ ਸੀ। ਹੁਣ ਇਹ ਸਕੂਲ ਪ੍ਰੇਰਨਾ ਸਕੂਲ ਦੇ ਨਾਂ ਨਾਲ ਜਾਣਿਆ ਜਾਂਦਾ ਹੈ। ਅੱਜ ਇਹ ਸਕੂਲ ਵਿਰਾਸਤੀ ਸਥਾਨ ਬਣ ਗਿਆ ਹੈ। ਵਡੋਦਰਾ ਦੇ ਮਹਾਰਾਜਾ ਸਯਾਜੀਰਾਓ ਗਾਇਕਵਾੜ ਨੇ ਸਾਲ 1888 ਵਿੱਚ ਇਸ ਸਕੂਲ ਨੂੰ ਬਣਾਇਆ ਸੀ।

ਇਹ ਸਕੂਲ ਨਰਿੰਦਰ ਮੋਦੀ ਦੇ ਮੁੱਖ ਮੰਤਰੀ ਬਣਨ ਤੋਂ ਬਾਅਦ ਚਰਚਾ ਵਿੱਚ ਆਇਆ ਸੀ। ਜਦੋਂ ਉਹ ਪ੍ਰਧਾਨ ਮੰਤਰੀ ਬਣੇ, ਗੁਜਰਾਤ ਸਰਕਾਰ ਨੇ ਇਸ ਨੂੰ ਇੱਕ ਮਾਡਲ ਸਕੂਲ ਵਜੋਂ ਵਿਕਸਤ ਕਰਨ ਅਤੇ ਇਸਨੂੰ ਇੱਕ ਪ੍ਰੇਰਨਾ ਕੇਂਦਰ ਬਣਾਉਣ ਦਾ ਫੈਸਲਾ ਕੀਤਾ ਸੀ। ਸਿੱਖਿਆ ਵਿਭਾਗ ਨੇ ਜੂਨ 2023 ਵਿੱਚ ਪ੍ਰੇਰਨਾ ਪ੍ਰੋਗਰਾਮ ਸ਼ੁਰੂ ਕਰਨ ਦੀ ਯੋਜਨਾ ਜਾਰੀ ਕੀਤੀ ਸੀ। ਇਸ ਤਹਿਤ ਹਰ ਮਹੀਨੇ ਦੇਸ਼ ਭਰ ਤੋਂ 20 ਵਿਦਿਆਰਥੀ (9ਵੀਂ ਤੋਂ 12ਵੀਂ ਜਮਾਤ ਤੱਕ) ਇੱਕ ਹਫ਼ਤੇ ਲਈ ਇੱਥੇ ਪੜ੍ਹਨ ਲਈ ਇਸ ਸਕੂਲ ਵਿੱਚ ਆਉਂਦੇ ਹਨ।

15 ਜਨਵਰੀ 2024 ਤੋਂ ਹੁਣ ਤੱਕ ਦੇਸ਼ ਦੇ 410 ਜ਼ਿਲ੍ਹਿਆਂ ਤੋਂ 820 ਵਿਦਿਆਰਥੀ ਇੱਥੇ ਆ ਚੁੱਕੇ ਹਨ। ਇਸ ਵਿੱਚ 6 ਰਾਜਾਂ ਮਹਾਰਾਸ਼ਟਰ, ਮੱਧ ਪ੍ਰਦੇਸ਼, ਹਰਿਆਣਾ, ਰਾਜਸਥਾਨ, ਗੁਜਰਾਤ ਅਤੇ ਦਮਨ ਦੇ ਵਿਦਿਆਰਥੀ ਸ਼ਾਮਲ ਹਨ। ਇਨ੍ਹਾਂ 7 ਦਿਨਾਂ ਦੌਰਾਨ ਵਿਦਿਆਰਥੀਆਂ ਨੂੰ ਸਵੈ-ਮਾਣ, ਸਤਿਕਾਰ, ਸੇਵਾ ਭਾਵਨਾ, ਸਮਰਪਣ, ਦਿਆਲਤਾ ਅਤੇ ਦੇਸ਼ ਭਗਤੀ ਨਾਲ ਸਬੰਧਤ ਪਾਠ ਪੜ੍ਹਾਏ ਜਾਂਦੇ ਹਨ।