ਲੁਧਿਆਣਾ : ਦੀਵਾਲੀ ਦੇ ਤਿਉਹਾਰ ਕਾਰਨ ਸ਼ਹਿਰ ਦੇ ਅੰਦਰੂਨੀ ਇਲਾਕਿਆਂ ‘ਚ ਆਵਾਜਾਈ ਦਾ ਬੁਰਾ ਹਾਲ ਹੈ, ਜਿਸ ਦੀ ਇਕ ਮਿਸਾਲ ਉਸ ਸਮੇਂ ਦੇਖਣ ਨੂੰ ਮਿਲੀ, ਜਦੋਂ ਅੱਗ ਬੁਝਾਉਣ ਜਾ ਰਹੀ ਫਾਇਰ ਵਿਭਾਗ ਦੀ ਗੱਡੀ (A Fire Department Vehicle) ਸੁਭਾਨੀ ਬਿਲਡਿੰਗ ਰੋਡ ‘ਤੇ ਜਾਮ ਕਾਰਨ ਫਸ ਗਈ। ਫਾਇਰ ਬ੍ਰਿਗੇਡ ਦੀ ਗੱਡੀ ਸਾਇਰਨ ‘ਤੇ ਸਾਇਰਨ ਵਜਾ ਰਹੀ ਸੀ ਪਰ ਖੁੱਲ੍ਹਣ ਦਾ ਨਾਂ ਹੀ ਨਹੀਂ ਲੈ ਰਿਹਾ ਸੀ। ਬਜ਼ਾਰ ਦੇ ਕੁਝ ਦੁਕਾਨਦਾਰਾਂ ਨੇ ਮੋਰਚਾ ਸੰਭਾਲ ਕੇ ਫਾਇਰ ਬਿ੍ਗੇਡ ਦੀ ਗੱਡੀ ਨੂੰ ਰਸਤਾ ਬਣਾ ਕੇ ਰਵਾਨਾ ਕੀਤਾ ।
ਸਮਾਜ ਸੇਵੀ ਸੁਰਿੰਦਰਾ ਸਿੰਘ ਅਲਵਰ, ਗੁਰਪ੍ਰੀਤ ਸਿੰਘ ਸੰਨੀ, ਗੁਰਸੇਵਕ ਸਿੰਘ, ਦਵਿੰਦਰ ਸਿੰਘ, ਬੀ.ਕੇ. ਸ਼ਰਮਾ, ਵਿਪਨ ਸ਼ਰਮਾ, ਰਜਿੰਦਰਾ ਢੀਂਗਰਾ, ਰਿਸ਼ੀ ਢੀਂਗਰਾ, ਰਮਨ ਸਿੰਗਲਾ, ਆਸ਼ੂ ਗੁਪਤਾ ਆਦਿ ਨੇ ਦੱਸਿਆ ਕਿ ਬਾਜ਼ਾਰਾਂ ਦੇ ਦੁਕਾਨਦਾਰਾਂ ਨੇ ਸੜਕ ‘ਤੇ ਨਾਜਾਇਜ਼ ਤੌਰ ‘ਤੇ ਸਾਮਾਨ ਦੀ ਪ੍ਰਦਰਸ਼ਨੀ ਲਗਾਈ ਹੋਈ ਹੈ । ਇਸ ਦੇ ਨਾਲ ਹੀ ਮਾਲ ਦੀ ਪੈਕਿੰਗ ਵੀ ਸੜਕ ’ਤੇ ਬਕਸੇ ਅਤੇ ਬੋਰੀਆਂ ਰੱਖ ਕੇ ਕੀਤੀ ਜਾਂਦੀ ਹੈ। ਬਾਜ਼ਾਰ ਤਾਂ ਪਹਿਲਾਂ ਹੀ ਤੰਗ ਹਨ, ਬਾਕੀ ਦੀ ਕਸਰ ਈ-ਰਿਕਸ਼ਾ ਚਾਲਕਾਂ ਨੇ ਪੂਰੀ ਕਰ ਦਿੱਤੀ ਹੈ ਜੋ ਬਜ਼ਾਰਾਂ ਵਿੱਚ ਅੱਡੇ ਬਣਾਏ ਹੋਏ ਹਨ।
