ਸੋਨੀਪਤ : ਭ੍ਰਿਸ਼ਟਾਚਾਰ ਰੋਕੂ ਬਿਊਰੋ (The Anti-Corruption Bureau),(ਏ.ਸੀ.ਬੀ.) ਦੀ ਸੋਨੀਪਤ ਟੀਮ ਨੇ ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (ਈ.ਪੀ.ਐੱਫ.ਓ.) ਦੇ ਸਹਾਇਕ ਕਮਿਸ਼ਨਰ ਅਤੇ ਇਨਫੋਰਸਮੈਂਟ ਅਫਸਰ ਨੂੰ 2 ਲੱਖ ਰੁਪਏ ਦੀ ਰਿਸ਼ਵਤ ਲੈਂਦਿਆਂ ਰੰਗੇ ਹੱਥੀਂ ਕਾਬੂ ਕੀਤਾ ਹੈ। ਸੋਨੀਪਤ ਦੇ ਸੈਕਟਰ-23 ਦੇ ਰਹਿਣ ਵਾਲੇ ਵਕੀਲ ਨੇ ਮੁਲਜ਼ਮਾਂ ਖ਼ਿਲਾਫ਼ ਸ਼ਿਕਾਇਤ ਦਰਜ ਕਰਵਾਈ ਸੀ। ਦੋਸ਼ ਹੈ ਕਿ ਪ੍ਰਾਈਵੇਟ ਸਕੂਲ ਦੇ ਪੀ.ਐਫ. ਸੰਬੰਧੀ ਸ਼ਿਕਾਇਤ ਦਾ ਨਿਪਟਾਰਾ ਕਰਨ ਦੇ ਨਾਂ ‘ਤੇ ਰਿਸ਼ਵਤ ਦੀ ਮੰਗ ਕੀਤੀ ਗਈ ਸੀ।
ਐਡਵੋਕੇਟ ਮੋਹਿਤ ਨੇ ਏ.ਸੀ.ਬੀ. ਸੋਨੀਪਤ ਦੀ ਟੀਮ ਨੂੰ ਦੱਸਿਆ ਕਿ ਉਸ ਦੇ ਗਾਹਕ ਦੇ ਸਕੂਲ ਦੇ ਪੀ.ਐੱਫ. ਸੰਬੰਧੀ ਸ਼ਿਕਾਇਤ ਦਾ ਨਿਪਟਾਰਾ ਕਰਨ ਦੇ ਬਦਲੇ ‘ਚ ਈ.ਪੀ.ਐੱਫ.ਓ ਇਨਫੋਰਸਮੈਂਟ ਅਫਸਰ ਮੁਕੇਸ਼ ਖੰਡੇਲਵਾਲ ਅਤੇ ਪੀ.ਐੱਫ. ਵਿਭਾਗ ਦੇ ਸਹਾਇਕ ਕਮਿਸ਼ਨਰ ਨੀਲੰਜਨ ਗੁਪਤਾ ਨੇ 2 ਲੱਖ ਰੁਪਏ ਦੀ ਰਿਸ਼ਵਤ ਦੀ ਮੰਗ ਕੀਤੀ ਹੈ। ਪਹਿਲਾਂ ਉਸ ਤੋਂ 15 ਲੱਖ ਰੁਪਏ ਦੀ ਮੰਗ ਕੀਤੀ ਗਈ ਸੀ। ਬਾਅਦ ਵਿੱਚ 2 ਲੱਖ ਰੁਪਏ ਵਿੱਚ ਸੌਦਾ ਹੋ ਗਿਆ। ਰੋਹਤਕ ਦੇ ਭ੍ਰਿਸ਼ਟਾਚਾਰ ਰੋਕੂ ਬਿਊਰੋ ਵਿੱਚ ਉਸ ਖ਼ਿਲਾਫ਼ ਕੇਸ ਦਰਜ ਕੀਤਾ ਗਿਆ ਸੀ। ਇਸ ਤੋਂ ਬਾਅਦ ਉਸਨੇ ਆਪਣੇ ਮੁਵੱਕਿਲ ਦੀ ਤਰਫੋਂ ਪੈਸੇ ਲੈ ਲਏ। ਏ.ਸੀ.ਬੀ. ਇੰਸਪੈਕਟਰ ਫਤਿਹ ਸਿੰਘ, ਏ.ਐੱਸ.ਆਈ. ਮਨਦੀਪ ਤੇ ਹੋਰ ਵੀ ਉਥੇ ਜਾਲ ਵਿਛਾ ਰਹੇ ਸਨ।
