ਤੇਲ ਅਵੀਵ : ਲੇਬਨਾਨੀ ਅੰਦੋਲਨ ਹਿਜ਼ਬੁੱਲਾ (Hezbollah) ਨੇ ਤੇਲ ਅਵੀਵ ਦੇ ਉਪਨਗਰ ਵਿੱਚ 8200 ਗਿਲੋਟ ਖੁਫੀਆ ਯੂਨਿਟ ਦੇ ਬੇਸ ਦੇ ਖ਼ਿਲਾਫ਼ ਜਵਾਬੀ ਕਾਰਵਾਈ ਕੀਤੀ, ਜਿਸ ਵਿੱਚ 22 ਇਜ਼ਰਾਈਲੀ ਸੈਨਿਕ ਮਾਰੇ ਗਏ ਅਤੇ 74 ਜ਼ਖ਼ਮੀ ਹੋ ਗਏ। ਇਹ ਜਾਣਕਾਰੀ ਲੇਬਨਾਨ ਦੇ ਅਲ ਮਾਯਾਦੀਨ ਟੀ.ਵੀ ਚੈਨਲ ਨੇ ਆਪਣੇ ਯੂਰਪੀ ਸੁਰੱਖਿਆ ਸੂਤਰਾਂ ਦੇ ਹਵਾਲੇ ਨਾਲ ਦਿੱਤੀ ਹੈ।
ਹਿਜ਼ਬੁੱਲਾ ਨੇ ਬੇਰੂਤ ਉਪਨਗਰ ਉੱਤੇ ਅਗਸਤ ਦੇ ਅਖੀਰ ਵਿੱਚ ਇਜ਼ਰਾਈਲੀ ਹਵਾਈ ਹਮਲੇ ਵਿੱਚ ਸੀਨੀਅਰ ਹਿਜ਼ਬੁੱਲਾ ਕਮਾਂਡਰ ਫੁਆਦ ਸ਼ੁਕਰ ਦੀ ਹੱਤਿਆ ਦੇ ਜਵਾਬ ਵਿੱਚ ਇਜ਼ਰਾਈਲੀ ਫੌਜੀ ਟੀਚਿਆਂ ਉੱਤੇ ਇੱਕ ਵਿਸ਼ਾਲ ਹਮਲਾ ਕੀਤਾ। ਹਿਜ਼ਬੁੱਲਾ ਨੇਤਾ ਹਸਨ ਨਸਰੱਲਾ ਨੇ ਇਕ ਬਿਆਨ ਵਿਚ ਕਿਹਾ ਕਿ ਜਵਾਬੀ ਹਮਲੇ ਦਾ ਮੁੱਖ ਨਿਸ਼ਾਨਾ ਤੇਲ ਅਵੀਵ ਉਪਨਗਰ ਵਿਚ ਇਜ਼ਰਾਈਲੀ ਫੌਜ ਦਾ 8200 ਗਿਲੋਟ ਯੂਨਿਟ ਬੇਸ ਸੀ।
ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਹਿਜ਼ਬੁੱਲਾ ਹਮਲੇ ਤੋਂ ਬਾਅਦ ਕਿਹਾ ਕਿ ਇਜ਼ਰਾਈਲੀ ਬਲਾਂ ਨੇ ਹਿਜ਼ਬੁੱਲਾ ਦੇ ਟਿਕਾਣਿਆਂ ‘ਤੇ ਅਗਾਊਂ ਹਮਲਾ ਕੀਤਾ ਸੀ ਅਤੇ ਲੇਬਨਾਨ ਦੇ ਪ੍ਰਤੀਰੋਧ ਦੇ ਜਵਾਬੀ ਕਾਰਵਾਈ ਤੋਂ ਘੰਟੇ ਪਹਿਲਾਂ, ਹਜ਼ਾਰਾਂ ਰਾਕੇਟ ਨਸ਼ਟ ਕਰ ਦਿੱਤੇ ਸਨ। ਇਜ਼ਰਾਈਲੀ ਫੌਜ ਨੇ ਕਿਹਾ ਕਿ ਹਿਜ਼ਬੁੱਲਾ ਦੇ ਟਿਕਾਣਿਆਂ ਅਤੇ ਹਥਿਆਰਾਂ ਨੂੰ ਨਸ਼ਟ ਕਰਨ ਲਈ ਲਗਭਗ 100 ਹਵਾਈ ਸੈਨਾ ਦੇ ਜਹਾਜ਼ਾਂ ਨੇ ਕਾਰਵਾਈ ਵਿੱਚ ਹਿੱਸਾ ਲਿਆ। ਉਨ੍ਹਾਂ ਨੇ ਅੰਦਾਜ਼ਾ ਲਗਾਇਆ ਕਿ ਇਜ਼ਰਾਈਲ ਨੂੰ ਆਖਰਕਾਰ ਹਮਲੇ ਵਿੱਚ ਬਹੁਤ ਘੱਟ ਨੁਕਸਾਨ ਹੋਇਆ ਹੈ।
