ਪੱਛਮੀ ਬੰਗਾਲ: ਕੋਲਕਾਤਾ ਦੇ ਆਰਜੀ ਕਾਰ ਕਾਲਜ ਅਤੇ ਹਸਪਤਾਲ ਵਿੱਚ ਇੱਕ ਸਿਖਿਆਰਥੀ ਡਾਕਟਰ ਦੇ ਬਲਾਤਕਾਰ ਅਤੇ ਫਿਰ ਬੇਰਹਿਮੀ ਨਾਲ ਕਤਲ ਦੇ ਮਾਮਲੇ ਵਿੱਚ ਮੁੱਖ ਦੋਸ਼ੀ ਸੰਜੇ ਰਾਏ (Sanjay Roy) ਇਸ ਸਮੇਂ ਕੋਲਕਾਤਾ ਵਿੱਚ ਪ੍ਰੈਜ਼ੀਡੈਂਸੀ ਸੁਧਾਰ ਘਰ ਵਿੱਚ ਬੰਦ ਹੈ। ਜੇਲ੍ਹ ਵਿੱਚ, ਹੋਰ ਕੈਦੀਆਂ ਵਾਂਗ, ਉਸਨੂੰ ਰੋਟੀ ਅਤੇ ਸਬਜ਼ੀ ਦਿੱਤੀ ਗਈ, ਜੋ ਉਸਨੇ ਖਾਣ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ। ਸੰਜੇ ਰਾਏ ਨੇ ਜੇਲ੍ਹ ਸਟਾਫ ਨੂੰ ਕਿਹਾ ਕਿ ਉਹ ਰੋਟੀ ਅਤੇ ਸਬਜ਼ੀ ਦੀ ਬਜਾਏ ਅੰਡਾ ਅਤੇ ਚਾਉ ਮੀਨ ਚਾਹੁੰਦਾ ਹੈ। ਉਸਨੇ ਇਹ ਵੀ ਕਿਹਾ ਕਿ ਉਸਨੂੰ ਜੇਲ੍ਹ ਦਾ ਖਾਣਾ ਪਸੰਦ ਨਹੀਂ ਆ ਰਿਹਾ ਹੈ। ਇਸ ਤਰ੍ਹਾਂ ਦੇ ਵਿਵਹਾਰ ਨੂੰ ਦੇਖਦਿਆਂ ਇਹ ਸਪੱਸ਼ਟ ਹੋ ਜਾਂਦਾ ਹੈ ਕਿ ਉਸ ਨੂੰ ਆਪਣੇ ਕੀਤੇ ਘਿਨਾਉਣੇ ਅਪਰਾਧ ਲਈ ਕੋਈ ਸ਼ਰਮ ਨਹੀਂ ਹੈ ਅਤੇ ਉਸ ਨੂੰ ਆਪਣੇ ਕੀਤੇ ਗਏ ਅਪਰਾਧ ਦੀ ਤੀਬਰਤਾ ਦਾ ਅਹਿਸਾਸ ਨਹੀਂ ਹੈ।
ਜੇਲ੍ਹ ਦੇ ਨਿਯਮ ਅਤੇ ਸੰਜੇ ਰਾਏ ਦੀ ਮੰਗ
ਜੇਲ੍ਹ ਦੇ ਨਿਯਮਾਂ ਅਨੁਸਾਰ ਕਿਸੇ ਵੀ ਕੈਦੀ ਨੂੰ ਉਹੀ ਭੋਜਨ ਦਿੱਤਾ ਜਾਂਦਾ ਹੈ ਜੋ ਸਾਰੇ ਕੈਦੀਆਂ ਲਈ ਤਜਵੀਜ਼ ਕੀਤਾ ਜਾਂਦਾ ਹੈ। ਵਿਸ਼ੇਸ਼ ਮਾਮਲਿਆਂ ਵਿੱਚ, ਕੈਦੀਆਂ ਨੂੰ ਘਰ ਤੋਂ ਖਾਣਾ ਮੰਗਵਾਉਣ ਦੀ ਇਜਾਜ਼ਤ ਦਿੱਤੀ ਜਾਂਦੀ ਹੈ। ਖ਼ਬਰਾਂ ਮੁਤਾਬਕ ਸੰਜੇ ਰਾਏ ਨੇ ਰੋਜ਼ਾਨਾ ਰੋਟੀ ਅਤੇ ਸਬਜ਼ੀ ਦਿੱਤੇ ਜਾਣ ‘ਤੇ ਗੁੱਸਾ ਜ਼ਾਹਰ ਕੀਤਾ ਅਤੇ ਅੰਡਾ ਚਾਉ ਮੀਨ ਦੀ ਮੰਗ ਕੀਤੀ। ਹਾਲਾਂਕਿ, ਜੇਲ੍ਹ ਸਟਾਫ ਨੇ ਉਸ ਦੀ ਅੰਡਾ ਚਾਉ ਮੀਨ ਦੀ ਮੰਗ ਨੂੰ ਠੁਕਰਾ ਦਿੱਤਾ ਅਤੇ ਉਸ ਨੂੰ ਸਖ਼ਤ ਤਾੜਨਾ ਕੀਤੀ। ਇਸ ਤੋਂ ਬਾਅਦ ਸੰਜੇ ਰਾਏ ਨੇ ਮਜਬੂਰੀ ‘ਚ ਰੋਟੀ ਅਤੇ ਸਬਜ਼ੀ ਖਾਧੀ।
ਸੀ.ਬੀ.ਆਈ. ਦੀ ਹਿਰਾਸਤ ਵਿੱਚ ਸੰਜੇ ਰਾਏ ਦਾ ਵਿਵਹਾਰ
ਸੀ.ਬੀ.ਆਈ. ਹਿਰਾਸਤ ਤੋਂ ਸੁਧਾਰ ਘਰ ਵਿੱਚ ਤਬਦੀਲ ਹੋਣ ਤੋਂ ਬਾਅਦ ਸੰਜੇ ਰਾਏ ਨੇ ਸੌਣ ਲਈ ਵਾਧੂ ਸਮਾਂ ਮੰਗਿਆ ਸੀ। ਇਸ ਤੋਂ ਇਲਾਵਾ ਉਹ ਆਪਣੇ ਆਪ ਨਾਲ ਗੱਲਾਂ ਕਰਦੇ ਵੀ ਨਜ਼ਰ ਆਏ। ਕੁਝ ਦਿਨਾਂ ਬਾਅਦ, ਉਸਨੇ ਆਪਣੀ ਆਮ ਸਥਿਤੀ ਵਿੱਚ ਵਾਪਸ ਆਉਣ ਦੀ ਕੋਸ਼ਿਸ਼ ਕੀਤੀ।
ਕੋਲਕਾਤਾ ਡਾਕਟਰ ਬਲਾਤਕਾਰ ਅਤੇ ਕਤਲ ਕੇਸ ਦੀ ਸਥਿਤੀ
ਕੋਲਕਾਤਾ ਡਾਕਟਰ ਦੇ ਬਲਾਤਕਾਰ ਅਤੇ ਕਤਲ ਮਾਮਲੇ ਦੀ ਜਾਂਚ ਵਿੱਚ ਹੁਣ ਤੱਕ ਸਿਰਫ਼ ਇੱਕ ਗ੍ਰਿਫ਼ਤਾਰੀ ਹੋਈ ਹੈ ਅਤੇ ਉਹ ਹੈ ਸੰਜੇ ਰਾਏ ਦੀ। ਕੋਲਕਾਤਾ ਪੁਲਿਸ ਦੇ ਸਿਵਲ ਵਲੰਟੀਅਰ ਵਜੋਂ ਜਾਣੇ ਜਾਂਦੇ ਸੰਜੇ ਰਾਏ ‘ਤੇ ਬਲਾਤਕਾਰ ਤੋਂ ਬਾਅਦ ਕਤਲ ਦਾ ਦੋਸ਼ ਲਗਾਇਆ ਗਿਆ ਹੈ।
ਸੀ.ਬੀ.ਆਈ. ਜਾਂਚ ਜਾਰੀ ਹੈ
ਸੀ.ਬੀ.ਆਈ. ਨੇ ਸੰਦੀਪ ਘੋਸ਼ ਨਾਲ ਪੁੱਛਗਿੱਛ ਜਾਰੀ ਰੱਖੀ ਹੋਈ ਹੈ।ਬੀਤੇ ਦਿਨ ਕੇਂਦਰੀ ਜਾਂਚ ਬਿਊਰੋ ਨੇ ਆਰਜੀ ਕਾਰ ਮੈਡੀਕਲ ਕਾਲਜ ਦੇ ਸਾਬਕਾ ਪ੍ਰਿੰਸੀਪਲ ਸੰਦੀਪ ਘੋਸ਼ ਨੂੰ ਲਗਾਤਾਰ 14ਵੇਂ ਦਿਨ ਤਲਬ ਕੀਤਾ।ਅਧਿਕਾਰੀਆਂ ਨੇ ਦੱਸਿਆ ਕਿ ਸੰਦੀਪ ਘੋਸ਼ ਤੋਂ ਏਜੰਸੀ ਨੇ 140 ਘੰਟੇ ਤੋਂ ਜ਼ਿਆਦਾ ਸਮੇਂ ਤੱਕ ਪੁੱਛਗਿੱਛ ਕੀਤੀ ਹੈ। ਸੰਦੀਪ ਘੋਸ਼ ਨੂੰ ਸਾਲਟ ਲੇਕ ਸਥਿਤ ਸੀ.ਜੀ.ਓ. ਕੰਪਲੈਕਸ, ਜੋ ਕਿ ਏਜੰਸੀ ਦਾ ਪੂਰਬੀ ਖੇਤਰੀ ਹੈੱਡਕੁਆਰਟਰ ਹੈ, ਵਿੱਚ ਸਵੇਰੇ 10:45 ਵਜੇ ਦੇ ਕਰੀਬ ਦੇਖਿਆ ਗਿਆ। ਉੱਥੇ ਉਸ ਨੂੰ ਅਹਾਤੇ ਦੇ ਅੰਦਰ ਘੁੰਮਦਾ ਦੇਖਿਆ ਗਿਆ, ਜਿਸ ਤੋਂ ਪਤਾ ਚੱਲਦਾ ਹੈ ਕਿ ਉਸ ਤੋਂ ਪੁੱਛਗਿੱਛ ਦੀ ਪ੍ਰਕਿਰਿਆ ਅਜੇ ਜਾਰੀ ਹੈ।
