ਜਲੰਧਰ : ਕੈਨੇਡਾ ‘ਚ 13 ਕਿਲੋ ਅਫੀਮ ਦਾ ਮਾਮਲਾ ਦਰਜ ਹੋਣ ਦੀ ਗੱਲ ਨੂੰ ਛੁਪਾ ਕੇ ਇਕ ਪਰਿਵਾਰ ਨੇ ਆਪਣੇ ਲੜਕੇ ਦਾ ਵਿਆਹ ਚੰਡੀਗੜ੍ਹ ਦੇ ਇਕ ਪ੍ਰੋਫੈਸਰ ਨਾਲ ਕਰਵਾ ਦਿੱਤਾ। ਸਜ਼ਾ ਤੋਂ ਬਾਅਦ ਜਦੋਂ ਲੜਕੇ ਦੇ ਮਾਪੇ ਆਪਣੀ ਨੂੰਹ ਨੂੰ ਦੱਸੇ ਬਿਨਾਂ ਆਪਣੀ ਧੀ ਕੋਲ ਭੱਜੇ ਤਾਂ ਹੌਲੀ-ਹੌਲੀ ਸਾਰੀਆਂ ਪਰਤਾਂ ਸਾਹਮਣੇ ਆਉਣੀਆਂ ਸ਼ੁਰੂ ਹੋ ਗਈਆਂ। ਇਸ ਤੋਂ ਬਾਅਦ ਲੜਕੀ ਦੇ ਪਰਿਵਾਰ ‘ਚ ਹਾਹਾਕਾਰ ਮੱਚ ਗਈ। ਪਤਾ ਲੱਗਾ ਕਿ ਲੜਕਾ ਜ਼ਮਾਨਤ ‘ਤੇ ਆ ਕੇ ਉਨ੍ਹਾਂ ਦੀ ਬੇਟੀ ਨਾਲ ਵਿਆਹ ਕਰਵਾ ਕੇ ਵਾਪਸ ਚਲਾ ਗਿਆ ਸੀ, ਜਦੋਂ ਕਿ ਉਸ ਦੇ ਮਾਪਿਆਂ ਨੇ ਵੀ ਕੇਸ ਦਰਜ ਹੋਣ ਦੀ ਗੱਲ ਲੁਕੋ ਕੇ ਆਪਣੇ ਪੁੱਤਰ ਨੂੰ ਕੈਨੇਡਾ ਦਾ ਪੀ.ਆਰ. ਦੱਸਿਆ ਸੀ।
ਪ੍ਰੋਫੈਸਰ ਦੇ ਪਿਤਾ ਜੋ ਕਿ ਜਲੰਧਰ ਦੇ ਰਹਿਣ ਵਾਲੇ ਹਨ, ਨੇ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਉਸ ਨੇ ਆਪਣੀ ਬੇਟੀ ਦਾ ਵਿਆਹ 9 ਮਈ 2022 ਨੂੰ ਹਿੱਲ ਵਿਊ ਇਨਕਲੇਵ ਭਾਖੜਾ ਰੋਡ ਨੰਗਲ ਦੇ ਰਹਿਣ ਵਾਲੇ ਸੁਰਿੰਦਰ ਕਾਂਤ ਵਰਮਾ ਪੁੱਤਰ ਨਿਤੀਸ਼ ਵਰਮਾ ਨਾਲ ਬਹੁਤ ਧੂਮਧਾਮ ਨਾਲ ਕੀਤਾ ਸੀ। ਵਿਆਹ ਤੋਂ ਪਹਿਲਾਂ ਲੜਕੇ ਦੇ ਪਿਤਾ ਸੁਰਿੰਦਰ ਕਾਂਤ ਅਤੇ ਮਾਂ ਨੀਲਮ ਵਰਮਾ ਨੇ ਉਨ੍ਹਾਂ ਨੂੰ ਝੂਠ ਬੋਲਿਆ ਕਿ ਉਨ੍ਹਾਂ ਦਾ ਲੜਕਾ ਕੈਨੇਡਾ ਵਿੱਚ ਪੀ.ਆਰ. ਹੈ ਜਿਸ ਦਾ ਉੱਥੇ ਰੀਅਲ ਅਸਟੇਟ ਦਾ ਕਾਰੋਬਾਰ ਅਤੇ ਵਾਸ਼ਿੰਗ ਸੈਂਟਰ ਹੈ। ਉਨ੍ਹਾਂ ਲੜਕੀ ਦੇ ਪਰਿਵਾਰ ਨੂੰ ਭਰੋਸਾ ਦਿੱਤਾ ਕਿ ਵਿਆਹ ਤੋਂ 5-6 ਮਹੀਨੇ ਬਾਅਦ ਨਿਤੀਸ਼ ਉਨ੍ਹਾਂ ਦੀ ਲੜਕੀ ਨੂੰ ਆਪਣੇ ਕੋਲ ਬੁਲਾ ਲਏਗਾ।
ਦੋਸ਼ ਹੈ ਕਿ ਨਿਤੀਸ਼ ਵਰਮਾ ਉਨ੍ਹਾਂ ਦੀ ਧੀ ਨਾਲ ਵਿਆਹ ਕਰਵਾ ਕੇ ਕਰੀਬ 20 ਦਿਨਾਂ ਬਾਅਦ ਕੈਨੇਡਾ ਪਰਤ ਗਿਆ ਸੀ। ਨੌਕਰੀ ਕਾਰਨ ਧੀ ਕੁਝ ਦਿਨਾਂ ਬਾਅਦ ਆਪਣੇ ਸਹੁਰੇ ਘਰ ਚਲੀ ਜਾਂਦੀ ਸੀ। ਵਿਆਹ ਤੋਂ 15 ਤੋਂ 16 ਮਹੀਨੇ ਬਾਅਦ ਜਦੋਂ ਧੀ ਆਪਣੇ ਸਹੁਰੇ ਘਰ ਗਈ ਤਾਂ ਉਸ ਨੇ ਘਰ ਨੂੰ ਤਾਲਾ ਲੱਗਿਆ ਦੇਖਿਆ। ਆਸੇ-ਪਾਸੇ ਪੁੱਛਣ ‘ਤੇ ਪਤਾ ਲੱਗਾ ਕਿ ਨਵ-ਵਿਆਹੀ ਔਰਤ ਦੇ ਸਹੁਰੇ ਪਰਿਵਾਰ ਵਾਲੇ ਬਿਨਾਂ ਦੱਸੇ ਅਮਰੀਕਾ ਰਹਿੰਦੀ ਆਪਣੀ ਧੀ ਕੋਲ ਚਲੇ ਗਏ ਸਨ। ਜਦੋਂ ਪ੍ਰੋਫੈਸਰ ਦੇ ਪਰਿਵਾਰਕ ਮੈਂਬਰਾਂ ਨੂੰ ਇਸ ਬਾਰੇ ਪਤਾ ਲੱਗਾ ਤਾਂ ਉਹ ਹੈਰਾਨ ਰਹਿ ਗਏ।
ਜਦੋਂ ਉਨ੍ਹਾਂ ਨੇ ਲੜਕੇ ਦੇ ਪਰਿਵਾਰ ਦੀ ਪੂਰੀ ਜਾਣਕਾਰੀ ਹਾਸਲ ਕੀਤੀ ਤਾਂ ਉਨ੍ਹਾਂ ਨੂੰ ਪਤਾ ਲੱਗਾ ਕਿ 7 ਜੁਲਾਈ 2019 ਨੂੰ ਨਿਤੀਸ਼ ਨੂੰ ਕੈਨੇਡੀਅਨ ਪੁਲਿਸ ਨੇ 13 ਕਿਲੋ ਅਫੀਮ ਸਮੇਤ ਫੜਿਆ ਸੀ। ਉਸ ਨੇ ਜ਼ਮਾਨਤ ‘ਤੇ ਆ ਕੇ ਉਨ੍ਹਾਂ ਦੀ ਲੜਕੀ ਨਾਲ ਵਿਆਹ ਕਰਵਾਇਆ ਸੀ ਅਤੇ ਉਸ ਦੇ ਮਾਤਾ-ਪਿਤਾ ਨੇ ਵੀ ਲੜਕੀ ਦੇ ਪਰਿਵਾਰ ਨੂੰ ਹਰ ਗੱਲ ਬਾਰੇ ਝੂਠ ਬੋਲਿਆ। ਅਗਸਤ 2023 ‘ਚ ਨਿਤੀਸ਼ ਨੂੰ ਕੈਨੇਡਾ ਦੀ ਅਦਾਲਤ ਨੇ 7 ਸਾਲ ਦੀ ਸਜ਼ਾ ਵੀ ਸੁਣਾਈ ਸੀ, ਜਿਸ ਤੋਂ ਬਾਅਦ ਉਸ ਦੇ ਮਾਤਾ-ਪਿਤਾ ਉੱਥੋਂ ਭੱਜ ਗਏ ਸਨ। ਪੀੜਤ ਪਰਿਵਾਰ ਨੇ ਦੋਸ਼ ਲਾਇਆ ਕਿ ਲੜਕੇ, ਉਸ ਦੇ ਪਿਤਾ ਅਤੇ ਮਾਂ ਨੇ ਉਨ੍ਹਾਂ ਨਾਲ ਝੂਠ ਬੋਲ ਕੇ ਵਿਆਹ ਕਰਵਾ ਲਿਆ ਅਤੇ ਲੜਕੀ ਦੀ ਜ਼ਿੰਦਗੀ ਬਰਬਾਦ ਕਰ ਦਿੱਤੀ।
ਮਾਮਲਾ ਉੱਚ ਪੁਲਿਸ ਅਧਿਕਾਰੀਆਂ ਦੇ ਧਿਆਨ ‘ਚ ਆਉਂਦੇ ਹੀ ਪੁਿਲਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਜਾਂਚ ਤੋਂ ਬਾਅਦ ਜਦੋਂ ਦੋਸ਼ ਸਹੀ ਪਾਏ ਗਏ ਤਾਂ ਨਿਤੀਸ਼ ਵਰਮਾ, ਉਸ ਦੇ ਪਿਤਾ ਸੁਰਿੰਦਰ ਕਾਂਤ ਵਰਮਾ ਅਤੇ ਮਾਂ ਨੀਲਮ ਰਾਣੀ ਦੇ ਖ਼ਿਲਾਫ਼ ਥਾਣਾ ਨਈ ਬਾਰਾਦਰੀ ਵਿਖੇ ਧੋਖਾਧੜੀ ਦਾ ਮਾਮਲਾ ਦਰਜ ਕੀਤਾ ਗਿਆ। ਫਿਲਹਾਲ ਨਿਤੀਸ਼ ਕੈਨੇਡਾ ‘ਚ ਹੈ ਅਤੇ ਉਨ੍ਹਾਂ ਦੇ ਮਾਤਾ-ਪਿਤਾ ਅਮਰੀਕਾ ‘ਚ ਹਨ।
