ਨਵੀਂ ਦਿੱਲੀ: ਅਮੇਠੀ ਦੀ ਸਾਬਕਾ ਸੰਸਦ ਮੈਂਬਰ ਸਮ੍ਰਿਤੀ ਇਰਾਨੀ (Former Amethi MP Smriti Irani) ਨੇ ਕਿਹਾ ਕਿ ਅਮੇਠੀ ਦੀ ਹਾਰ ਦਾ ਉੱਚ ਲੀਡਰਸ਼ਿਪ ਪੱਧਰ ‘ਤੇ ਵਿਸ਼ਲੇਸ਼ਣ ਹੋ ਚੁੱਕਾ ਹੈ। ਕੀ ਹੋਇਆ? ਇਹ ਇੱਥੇ ਨਹੀਂ ਦੱਸਿਆ ਜਾ ਸਕਦਾ। ਸਮ੍ਰਿਤੀ ਇਰਾਨੀ ਨੇ ਕਿਹਾ ਕਿ ਮੈਂ ਤਾਂ ਅਮੇਠੀ ਵਿੱਚ ਆਪਣੇ ਆਪ ਨੂੰ ਉਪਲਬਧ ਰੱਖਿਆ, ਉੱਥੇ ਸੰਸਦ ਮੈਂਬਰਾਂ ਦੇ ਉਪਲਬਧ ਨਾ ਹੋਣ ਦੀਆਂ ਸ਼ਿਕਾਇਤਾਂ ਆਉਂਦੀਆਂ ਸਨ। ਸਮ੍ਰਿਤੀ ਇਰਾਨੀ ਨੇ ਕਿਹਾ ਕਿ ਮੈਂ ਦੋ ਵਾਰ ਅਸੁਰੱਖਿਅਤ ਸੀਟਾਂ ਤੋਂ ਚੋਣ ਲੜ ਚੁੱਕੀ ਹਾਂ। ਮੈਂ 2014, 2019 ਜਾਂ 2024 ਵਿੱਚ ਵੀ ਟਿਕਟ ਨਹੀਂ ਮੰਗੀ। ਮੈਨੂੰ ਬਿਨਾਂ ਪੁੱਛੇ ਹੀ ਪਾਰਟੀ ਨੇ ਮੌਕਾ ਦਿੱਤਾ ਸੀ।
ਅਮੇਠੀ ਵਿੱਚ ਆਪਣੀ ਹਾਰ ਦੇ ਬਾਰੇ ਵਿੱਚ ਸਮ੍ਰਿਤੀ ਇਰਾਨੀ ਨੇ ਕਿਹਾ ਕਿ ਮੇਰੇ ਲਈ ਵੱਡੀ ਜਿੱਤ ਇਹ ਹੈ ਕਿ ਉੱਥੇ ਬਹੁਤ ਸਾਰੇ ਲੋਕਾਂ ਨੇ ਕਿਹਾ ਕਿ ਮੈਂ ਵਾਪਸੀ ਕਰਾਂਗੀ। ਜਨਤਾ ਦਾ ਮੇਰੇ ‘ਤੇ ਇਹ ਭਰੋਸਾ ਹੀ ਮੇਰੀ ਜਿੱਤ ਹੈ। ਉਨ੍ਹਾਂ ਨੇ ਇੱਕ ਪੋਡਕਾਸਟ ਵਿੱਚ ਕਿਹਾ ਕਿ ਜਦੋਂ ਮੈਂ ਅਮੇਠੀ ਗਈ ਸੀ ਤਾਂ ਉੱਥੇ 4 ਲੱਖ ਲੋਕਾਂ ਲਈ ਘਰ ਬਣਾਏ ਗਏ । 3.5 ਲੱਖ ਲੋਕਾਂ ਦੇ ਘਰਾਂ ਵਿੱਚ ਟਾਇਲਟ ਬਣਾਏ ਗਏ । ਪੰਜਾਹ ਪਿੰਡ ਅਜਿਹੇ ਸਨ ਜਿੱਥੇ ਆਜ਼ਾਦੀ ਤੋਂ ਬਾਅਦ ਕੋਈ ਸੜਕ ਨਹੀਂ ਬਣੀ। ਮੈਂ 80 ਹਜ਼ਾਰ ਲੋਕਾਂ ਨੂੰ ਗੈਸ ਕੁਨੈਕਸ਼ਨ ਦਿੱਤੇ ਹਨ। ਉਨ੍ਹਾਂ ਕਿਹਾ ਕਿ ਮੇਰੇ ਲਈ ਸਫ਼ਲਤਾ ਇਹ ਹੈ ਕਿ ਮੈਂ 50 ਹਜ਼ਾਰ ਬੱਚਿਆਂ ਨੂੰ ਕੇਂਦਰੀ ਵਿ ਦਿਆਲਿਆ ਵਿੱਚ ਦਾਖਲਾ ਦਿਵਾਉਣ ਵਿੱਚ ਮਦਦ ਕੀਤੀ।
ਸਾਬਕਾ ਕੇਂਦਰੀ ਮੰਤਰੀ ਸਮ੍ਰਿਤੀ ਇਰਾਨੀ ਨੇ ਕਿਹਾ ਕਿ ਅਟਲ ਬਿਹਾਰੀ ਵਾਜਪਾਈ ਵੀ ਚੋਣਾਂ ਹਾਰ ਗਏ ਸਨ। ਨਰਿੰਦਰ ਮੋਦੀ ਇਕੱਲੇ ਅਜਿਹੇ ਵਿਅਕਤੀ ਹਨ ਜੋ ਕਦੇ ਚੋਣ ਨਹੀਂ ਹਾਰੇ। ਇੰਨਾ ਹੀ ਨਹੀਂ ਇਸ ਦੌਰਾਨ ਉਨ੍ਹਾਂ ਬਦਲਦੇ ਸਿਆਸੀ ਬਿਰਤਾਂਤ ਬਾਰੇ ਵੀ ਗੱਲ ਕੀਤੀ ਅਤੇ ਕਿਹਾ ਕਿ ਹੁਣ ਜਿਸ ਤਰ੍ਹਾਂ ਜਾਤ-ਪਾਤ ਦੀ ਗੱਲ ਕੀਤੀ ਜਾ ਰਹੀ ਹੈ, ਉਹ ਪ੍ਰੇਸ਼ਾਨ ਕਰਨ ਵਾਲਾ ਹੈ। ਸਮ੍ਰਿਤੀ ਇਰਾਨੀ ਨੇ ਕਿਹਾ ਕਿ ਅੱਜ ਇਹ ਵਿਡੰਬਨਾ ਹੈ ਕਿ ਜਾਤ ਅਤੇ ਗੋਤ ਦੇ ਮੁੱਦਿਆਂ ‘ਤੇ ਵੀ ਚਰਚਾ ਕੀਤੀ ਜਾ ਰਹੀ ਹੈ। ਲੋਕ ਮੈਨੂੰ ਪੁੱਛਦੇ ਹਨ ਕਿ ਤੁਸੀਂ ਕਿਸੇ ਪਾਰਸੀ ਨਾਲ ਵਿਆਹ ਕੀਤਾ ਹੈ। ਤੁਹਾਡੇ ਮਾਤਾ ਅਤੇ ਪਿਤਾ ਕੌਣ ਸਨ? ਉਨ੍ਹਾਂ ਦੀ ਜਾਤ ਅਤੇ ਗੋਤ ਕੀ ਸੀ?
240 ਲੋਕ ਸਭਾ ਸੀਟਾਂ ਹੀ ਜਿੱਤ ਕੇ ਨਰਿੰਦਰ ਮੋਦੀ ਕਮਜ਼ੋਰ ਹੋ ਗਏ ਹਨ? ਇਸ ਸਵਾਲ ‘ਤੇ ਸਮ੍ਰਿਤੀ ਇਰਾਨੀ ਨੇ ਕਿਹਾ ਕਿ ਉਹ ਕਮਜ਼ੋਰ ਨਹੀਂ ਹੋ ਸਕਦੇ। ਮੈਂ ਉਨ੍ਹਾਂ ਨੂੰ 20 ਸਾਲਾਂ ਤੋਂ ਦੇਖਿਆ ਹੈ। ਉਨ੍ਹਾਂ ਕਿਹਾ ਕਿ ਅਮੇਠੀ ਬਾਰੇ ਬਹੁਤ ਕੁਝ ਬੋਲਿਆ ਜਾ ਰਿਹਾ ਹੈ। ਪਰ ਇਹ ਵੀ ਸੱਚ ਹੈ ਕਿ ਗਾਂਧੀ ਪਰਿਵਾਰ ਉਥੇ ਚੋਣ ਲੜਨ ਨਹੀਂ ਆਇਆ। ਸਮ੍ਰਿਤੀ ਇਰਾਨੀ ਨੇ ਕਿਹਾ ਕਿ ਮੈਂ 2019 ਵਿੱਚ ਕਾਂਗਰਸ ਪ੍ਰਧਾਨ ਨੂੰ ਹਰਾਇਆ ਸੀ। ਇਸ ਤੱਥ ਨੂੰ ਕੋਈ ਨਹੀਂ ਮਿਟਾ ਸਕਦਾ। ਉਨ੍ਹਾਂ ਕਿਹਾ ਕਿ ਜੇਕਰ ਮੈਂ ਅਮੇਠੀ ਹਾਰਨ ਵਾਲੀ ਹੁੰਦੀ ਤਾਂ ਗਾਂਧੀ ਪਰਿਵਾਰ ‘ਚੋਂ ਕੋਈ ਨਾ ਕੋਈ ਵਿਅਕਤੀ ਜ਼ਰੂਰ ਲੜਦਾ।
