ਪਟਨਾ: ਬਿਹਾਰ ਦੇ ਰਾਜਗੀਰ ‘ਚ ਹੋਣ ਵਾਲੀ ਮਹਿਲਾ ਏਸ਼ੀਅਨ ਹਾਕੀ ਚੈਂਪੀਅਨਸ ਟਰਾਫੀ (The Women’s Asian Hockey Champions Trophy) ਦੇ ਮੈਚਾਂ ਦੇ ਸਮੇਂ ‘ਚ ਬਦਲਾਅ ਕੀਤਾ ਗਿਆ ਹੈ। ਦਰਅਸਲ, ਮਹਿਲਾ ਏਸ਼ੀਅਨ ਚੈਂਪੀਅਨਜ਼ ਟਰਾਫੀ ਦੇ ਸਾਰੇ ਮੈਚ ਹੁਣ ਸ਼ਾਮ ਦੀ ਬਜਾਏ ਦੁਪਹਿਰ ਨੂੰ ਖੇਡੇ ਜਾਣਗੇ ਤਾਂ ਜੋ ਫਲੱਡ ਲਾਈਟਾਂ ਹੇਠ ਕੀੜੇ-ਮਕੌੜਿਆਂ ਦੇ ਝੁੰਡ ਦੇ ਸੰਭਾਵੀ ਦਖਲ ਤੋਂ ਬਚਿਆ ਜਾ ਸਕੇ। ਏਸ਼ੀਅਨ ਹਾਕੀ ਫੈਡਰੇਸ਼ਨ ਅਤੇ ਮੇਜ਼ਬਾਨ ਹਾਕੀ ਇੰਡੀਆ ਨੇ ਬੀਤੇ ਦਿਨ ਇਸ ਦਾ ਐਲਾਨ ਕੀਤਾ।
ਇਹ ਨਾ ਸਿਰਫ਼ ਟੀਮਾਂ ਲਈ ਸਗੋਂ ਬਿਹਾਰ ਦੇ ਲੋਕਾਂ ਲਈ ਵੀ ਯਾਦਗਾਰ ਅਨੁਭਵ ਹੋਣਾ ਚਾਹੀਦਾ ਹੈ
ਸੋਧੇ ਹੋਏ ਪ੍ਰੋਗਰਾਮ ਦੇ ਮੁਤਾਬਕ ਦਿਨ ਦਾ ਪਹਿਲਾ ਮੈਚ ਹੁਣ 12.15 ਵਜੇ, ਦੂਜਾ 2.30 ਵਜੇ ਅਤੇ ਆਖਰੀ 4.45 ਵਜੇ ਖੇਡਿਆ ਜਾਵੇਗਾ। ਪਹਿਲਾਂ ਇਹ ਮੈਚ ਦੁਪਹਿਰ 3 ਵਜੇ, 5.15 ਅਤੇ ਸ਼ਾਮ 7.30 ਵਜੇ ਹੋਣੇ ਸਨ। ਹਾਕੀ ਇੰਡੀਆ ਦੇ ਪ੍ਰਧਾਨ ਦਿਲੀਪ ਟਿਰਕੀ ਨੇ ਇੱਕ ਰਿਲੀਜ਼ ਵਿੱਚ ਕਿਹਾ, ‘ਸਾਡੀ ਤਰਜੀਹ ਖਿਡਾਰੀਆਂ, ਪ੍ਰਸ਼ੰਸਕਾਂ ਅਤੇ ਟੂਰਨਾਮੈਂਟ ਨਾਲ ਜੁੜੇ ਹਰ ਕਿਸੇ ਦੀ ਸੁਰੱਖਿਆ ਹੈ।’ ਉਨ੍ਹਾਂ ਨੇ ਕਿਹਾ, ‘ਹਾਕੀ ਇੱਕ ਨਵੇਂ ਸਥਾਨ ‘ਤੇ ਖੇਡੀ ਜਾ ਰਹੀ ਹੈ ਅਤੇ ਅਸੀਂ ਇਹ ਯਕੀਨੀ ਬਣਾਉਣਾ ਚਾਹੁੰਦੇ ਹਾਂ ਕਿ ਈਵੈਂਟ ਸਰਵੋਤਮ ਹੋਵੇ।’ ਇਹ ਨਾ ਸਿਰਫ਼ ਟੀਮਾਂ ਲਈ ਸਗੋਂ ਬਿਹਾਰ ਦੇ ਲੋਕਾਂ ਲਈ ਵੀ ਯਾਦਗਾਰੀ ਅਨੁਭਵ ਹੋਣਾ ਚਾਹੀਦਾ ਹੈ ਜੋ ਇਸ ਟੂਰਨਾਮੈਂਟ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ।
ਇਸ ਟੂਰਨਾਮੈਂਟ ਵਿੱਚ 6 ਟੀਮਾਂ ਲੈ ਰਹੀਆਂ ਹਨ ਭਾਗ
ਇਹ ਫ਼ੈਸਲਾ ਟੂਰਨਾਮੈਂਟ ਪ੍ਰਬੰਧਕ ਕਮੇਟੀ ਨਾਲ ਸਲਾਹ ਮਸ਼ਵਰਾ ਕਰਨ ਅਤੇ ਟੀਮਾਂ ਦੇ ਫੀਡਬੈਕ ਤੋਂ ਬਾਅਦ ਲਿਆ ਗਿਆ। ਰਾਜਗੀਰ ਵਿੱਚ ਸਟੇਡੀਅਮ ਝੋਨੇ ਦੇ ਖੇਤਾਂ ਨਾਲ ਘਿਰਿਆ ਹੋਇਆ ਹੈ, ਜੋ ਸਾਲ ਦੇ ਇਸ ਸਮੇਂ ਵੱਡੀ ਗਿਣਤੀ ਵਿੱਚ ਕੀੜੇ-ਮਕੌੜੇ ਆਕਰਸ਼ਿਤ ਕਰਦੇ ਹਨ। ਇਸ ਟੂਰਨਾਮੈਂਟ ਵਿੱਚ ਭਾਰਤ ਤੋਂ ਇਲਾਵਾ ਚੀਨ, ਜਾਪਾਨ, ਕੋਰੀਆ, ਮਲੇਸ਼ੀਆ ਅਤੇ ਥਾਈਲੈਂਡ ਦੀਆਂ ਟੀਮਾਂ ਹਿੱਸਾ ਲੈ ਰਹੀਆਂ ਹਨ। 11 ਤੋਂ 20 ਨਵੰਬਰ ਤੱਕ ਹੋਣ ਵਾਲੇ ਇਸ ਟੂਰਨਾਮੈਂਟ ਵਿੱਚ ਚੋਟੀ ਦੀਆਂ ਚਾਰ ਟੀਮਾਂ ਸੈਮੀਫਾਈਨਲ ਖੇਡਣਗੀਆਂ।
